前日阿仙奴喺慈善盾擊敗利物浦順利捧盃，我求大俠先喺呢度恭喜佢哋。不過，講番嗰場波「紅軍」嘅表現，就真係令我有啲失望。
首先，利物浦嘅英格蘭中場謝拉特鬼咁茅，好似阿仙奴雲格話齋，佢唔使做「紅牌阿姑」認真執到。不過，最唔掂嘅都算係利物浦新簽嘅前鋒迪奧夫，佢全場表現已經唔突出，喺下半場重有次喺阿仙奴禁區內插水，俾球證韋利識穿咗之後，重偷笑㖭！
不過，佢喺賽後就猛話自己冇插水，話自己真係俾阿仙奴嘅韋拉侵犯，嗰球應該係十二碼。對於自己偷笑，佢一樣話冇，重話可能自己有啲哨牙，令人誤會喎！咁都得？

卡洛斯忽然怕朗拿度
睇咗呢段消息，我求大俠就知乜嘢叫人情冷暖。話說當日有傳巴西前鋒朗拿度可能過檔皇家馬德里時，皇馬嘅巴西國腳後衞卡洛斯大表歡迎。不過，當佢知自己係朗拿度單交易嘅一部份，即係皇馬搵佢加馬基列尼再加錢交換朗拿度之後，卡洛斯就即刻話自己唔想走，叫朗拿度唔好嚟！