當年今日

夏日球驗客:迪奧夫真插水?假哨牙?

蘋果日報 2002/08/13 00:00


前日阿仙奴喺慈善盾擊敗利物浦順利捧盃,我求大俠先喺呢度恭喜佢哋。不過,講番嗰場波「紅軍」嘅表現,就真係令我有啲失望。
首先,利物浦嘅英格蘭中場謝拉特鬼咁茅,好似阿仙奴雲格話齋,佢唔使做「紅牌阿姑」認真執到。不過,最唔掂嘅都算係利物浦新簽嘅前鋒迪奧夫,佢全場表現已經唔突出,喺下半場重有次喺阿仙奴禁區內插水,俾球證韋利識穿咗之後,重偷笑㖭!
不過,佢喺賽後就猛話自己冇插水,話自己真係俾阿仙奴嘅韋拉侵犯,嗰球應該係十二碼。對於自己偷笑,佢一樣話冇,重話可能自己有啲哨牙,令人誤會喎!咁都得?

卡洛斯忽然怕朗拿度
睇咗呢段消息,我求大俠就知乜嘢叫人情冷暖。話說當日有傳巴西前鋒朗拿度可能過檔皇家馬德里時,皇馬嘅巴西國腳後衞卡洛斯大表歡迎。不過,當佢知自己係朗拿度單交易嘅一部份,即係皇馬搵佢加馬基列尼再加錢交換朗拿度之後,卡洛斯就即刻話自己唔想走,叫朗拿度唔好嚟!
拉素未必唔賣尼斯達
意大利國腳後衞尼斯達可能離開拉素,係意球壇近日熱門話題,不過拉素日前拒絕咗AC米蘭嘅二千六百萬歐元(約二億三百萬港元)最後出價,AC米蘭亦話唔會買尼斯達。不過,我求大俠覺得尼斯達轉會未必告一段落,畢竟拉素係唔接受AC米蘭個開價,或者遲啲會將佢賣畀出得起價嘅球會呢!

華夫達做老竇未諗復出
澳洲網球好手華夫達近日晒命,話好享受目前初為人父嘅快樂,暫時冇諗過幾時捲土重來咁話,咁就慘啦!𠵱家出色嘅球手已經買少見少,老將阿加斯、森柏斯怕唔擺得幾耐,一班年輕球手除咗曉域治之外,都冇邊個可以睇得上眼,我求驗客最怕男子網壇會變成女子網壇咁,俾一、兩個人玩晒就冇癮啦!