遠東發展（035）主力係兩瓣業務，分別係在內地發展地產同在中港兩地經營酒店，酒店業務發展迅速，每年提供穩步上升的收益，而內地房地產業務亦已進入高收成期，以中線投資為出發點，遠展係穩健而又可大賺的對象，持有一至兩年，股價有機會倍升。
以內地房產股而言，遠展「晒士」屬中型，但過去一年，同類型內房股的股價大幅上升，由幾成至幾倍不等，但遠展就未郁過。由06年2月開始，遠展股價就在3元至4元間上落，噚日仍只係企於3.50元水平，大落後。
公司有理想業績，股價唔升，時機未到而已。07年度（3月年結），遠展營業額9.88億元，升41%，獲利5.39億元，升60.8%，每股盈利37仙，升56.7%。
遠展盤數有兩點要留意，一係期內出售美國物業權益產生2.25億元收益，第二係內地主打的上海錦秋花園項目，雖售出500個單位，但會在08年度才入賬。

遠展在上海、成都、廣州及武漢等主要城市有物業發展項目，其中以發展多年的上海錦秋花園，在未來幾年會繼續向集團提供可觀的盈利貢獻。錦秋花園地積比率已由0.9倍提升至1.3至1.5倍，令直到2012年，每年仍有千多至二千個單位落成。
酒店方面，已由7間增至9間，客房數目已上升到2371間，成都及武漢兩幢大廈，將改建為4星級酒店，成都麗都酒店提供500個房間及商場，預期明年初可啓業。
集團旗下的觀塘工廈，已申請改建酒店，並獲批准，而分拆酒店REIT，亦已有時間表，初步的組合為7至8家，估值約40多億元，集資約20億元，分拆後，基金會積極吸納內地的酒店。
現年度，上海錦秋花園售樓利潤入賬，加上酒店、投資和財務管理，以及港澳、澳洲和馬來西亞的發展項目收益，估計盈利可上升至6億元，每股盈利0.40元；09年度盈利可再上升至7.5億元，每股盈利0.51元，以12倍PE計，1年目標價係6元。遠展股價由低位回升，一衝破徘徊區頂部4元阻力，即可確認開展升浪，初步上升目標係5元。