【車Cam直擊】停低重貨突踩油跌到阿伯攤攤腰

蘋果日報 2018/06/03 14:58

重型貨車旺角過馬路失平衡

旺角人山人海，駕駛人士切忌心浮氣燥，要瞻前顧後，隨時做好準備。星期六朝早旺角一架停低嘅重型貨車突然開車，一個過路伯伯唔為意差啲被撞，好彩伯伯反應夠快向後退，先至冇被車撞倒，但就失平衡跌落地。貨車司機同其他熱心人見到即刻幫人扶起伯伯。

有車cam星期六朝早約8點半影到，一架重型貨車停低喺旺角砵蘭街同豉油街交界，車上一個男人落車，似乎準備落貨。呢個時候一個伯伯頭耷耷慢慢橫過馬路，行近貨車車頭時，貨車突然開車，伯伯嚇一嚇，馬上反應過來碎步向後退避，不過失平衡pat pat落地，睇見都覺得痛！

至於重型貨車見出事立即停低，車上有個人跳落車了解，其他路人亦非常熱心過去幫手，前後4個人關心伯伯，但佢似乎一時起唔到身。休息咗超過半分鐘，伯伯喺眾人扶住先至企得返起身，拐步行返上行人路。所以話無論大與小，禮讓最緊要，要駛出真功夫，方為大師傅！

重貨在旺角砵蘭街及豉油街交界停車，懷疑想卸貨。(fb「小心駕駛」群組截圖)

伯伯慢慢橫過馬路。(fb「小心駕駛」群組截圖)

他走到貨車車頭時，貨車突然開車。(fb「小心駕駛」群組截圖)

伯伯反應快速地後退。(fb「小心駕駛」群組截圖)

但他失平衡跌倒。(fb「小心駕駛」群組截圖)

途人及貨車跟車都上前關心伯伯。(fb「小心駕駛」群組截圖)

【車Cam直擊】停低重貨突踩油 跌到阿伯攤攤腰