聽日就入伍嘅韓劇《感激時代》男星金賢重，喺入伍前都冇得好好休息，反而要成日應付前女友A小姐嘅忽然爆料，繼之前A小姐入稟向佢索取逾千萬港元賠償後，今日A小姐方面又有新料爆。

今日韓媒方面就公開咗金賢重同A小姐嘅短訊，當中A小姐喺短訊就寫：「去年懷咗金賢重嘅孩子，但係金賢重嘅暴打令到我流產了。」金賢重嘅代表律師亦都即刻回應話：「喺對方話流產後，我哋首先要確認一下醫院嘅相關資料，再做進一步決定。而且懷孕同流產都係佢單方面嘅主張，冇任何證據。對方話上年6月自然流產後曾經到醫院進行治療，我哋要求進一步嘅調查。如果冇嗰家醫院接受治療嘅證明，咁我哋就會以恐嚇罪作出起訴。」

由於金賢重同A小姐嘅糾紛峰迴路轉，令到唔少網友都議論紛紛，覺得佢哋嘅事仲精采過連續劇同電影，有網民亦為金賢重抱不平，留言話：「呢個女人好歹也愛過金賢重吧？為什麼0依家要一直咬住唔放？錢錢錢，為咗錢完全拋棄金賢重了啊」、「雖然金賢重都有唔啱，但呢個女人真係極品，你到底想要乜嘢？真好奇你嘅精神狀態」。