【李八方online】林鄭都割席？「搞亂香港」回顧片未見警隊出鏡
蘋果日報 2019/12/31 13:22
陳茂波林鄭月娥羅致光陳帆
仲有唔夠一日就係2020年，特首林鄭月娥就喺自己fb專頁出咗條3分鐘短片，搵埋財政司司長陳茂波、勞福局長羅致光同埋運房局長陳帆，回顧一下自己點樣「搞亂」香港外，仲話會繼續虛心聆聽、尋求出路，相信香港可以重新出發。八方睇完條片覺得真係驚為天人，究竟邊位天才整呢條片出嚟，等林鄭詛咒自己？
條片第一個畫面係一隻麻鷹喺天空盤旋搵食，麻鷹係食腐肉嘅，八方一睇到已經感受到呢條片係別有用心。
之後係林鄭一輪獨白，話香港經歷咗前所未有嘅嚴峻挑戰，市民感到痛心、焦慮、失望、憤怒，作為特首嘅佢責無旁貸。呢啲都係無講錯嘅。跟住佢話會虛心聆聽搵出路，過程中堅守一國兩制原則及維護法治核心價值，大家可以聽住先。
接住就係陳茂波、羅致光、陳帆先後出場，講吓自己範疇內做咗乜、將會做乜。重點除咗陳茂波面露微笑、嘴角上揚外，林鄭同羅致光、陳帆一樣，都係木口木面，莫非當中有咩玄機？與此同時，其他官究竟去咗邊？點解條片佢哋無份？更特別嘅係，林鄭話自己除咗3萬警察之外就乜都冇，但係片入面連示威者都有得出場，反而警察無份，真係相當有意思。
最後埋尾，林鄭就話香港人憑毅力、智慧安然渡過咗唔少風浪，相信港人可以再克服困難，重建香港，新一年帶嚟新希望，香港可以重新出發。的確係嘅，呢半年證明咗香港人真係好叻，話核彈都唔割就係唔割。
至於段片最後一個畫面就係航拍鏡頭，由東飛向西，而且係日落，上面加句「珍惜香港 這個家」。開頭已經有麻鷹，收尾仲整個奔向夕陽，真係天才先諗到咁有意境嘅首尾呼應，整呢條片嘅其實係咪手足嚟㗎？
-----------------------------
民陣元旦大遊行
片段截圖