明日，就係6.23，香港歷史將會記住呢一日。可以預見，到時候，立法會內仍然會唇槍舌劍。立法會外，就隨時萬人空巷。由27個團體發起嘅623全民包圍立法會集會，早上10點開波，直踩到晚上立法會會議結束。佢哋話，如果星期四續會，集會繼續，以爭取政府撤回方案，重新諮詢，並推出真正走向民主嘅方案。

經過反高鐵一役，今次唔止警方嚴陣以待，集會參加者亦不容有失，其中社運界潮醫「星屑醫生」歐陽英傑正緊急招募成立「社運醫療小組」，呼籲醫護界同道屆時喺立法會外候命幫手。星屑話，初步已有五、六個醫生、護士加入；由於集會時間長，佢哋有啲人又要返工，所以佢會編更，大家輪流當值。
參加過反高鐵運動嘅星屑話，今次成立呢個醫療小組，係要同警方抗衡。小組除咗會處理集會人士中暑之類嘅情況外，根據過去經驗，警方強行清場抬人時，都會搞到啲示威者好唔舒服，出現頭暈、抽筋等症狀，咁到時佢哋就會幫手治理。
仲有，如果一旦有示威者被警方搞到瘀傷呀咁，佢哋一班擁有專業醫護資格嘅小組成員，就會即場替示威者驗傷，記錄在案，等示威者可以保障番自己，亦方便日後跟進。

仲有，呢期好多遊行集會都有示威者投訴警方玩插水，兩三下手勢就哎吔一聲倒地。星屑話，作為專業醫護人員，係「有救無類」嘅，警察不適，佢哋一樣會幫，「係咪扮嘢實知o架」。
一向注重衣着嘅星屑話，到時佢哋就唔會着醫生袍、護士衫，家諗住組員可能會一式戴頂有個十字標誌嘅鴨舌帽，或者戴埋臂章，以作識別。醫療站嘅設備一啲都唔馬虎，星屑揚言可以做到小型手術，縫針之類一定冇問題。另外，佢哋會準備大量清水，幫被胡椒噴霧射中眼睛嘅示威者洗眼。
6.23集會到時仲會好似反高鐵當日咁，直播立法會會議情況，由林旭華、邵家臻、快必擔任評述，仲有論壇、攤位呀咁，網上直播由網台聯盟、獨立媒體網負責，仲同步以twitter、facebook報道最新動態（twittertag#hk623）。

mailto:[email protected]