當年今日
關於我們

【告李力持誹謗】盧覓雪憶自細遭人歧視:肥人應該要死㗎啦

蘋果日報 2020/06/27 06:00

梁思浩盧覓雪李力持

盧覓雪由傳媒人到電台DJ再涉足電影及做網台主持,在圈中瓣數多、人脈廣,長袖善舞、挑通眼眉,早前卻因為一個撐警暴的藍絲李力持,大動肝火。事緣3個月前,「真心膠」李導演竟將一條5年前的性愛片截圖上載到facebook,直指是盧覓雪因遺失電話而將性愛片流出云云,盧覓雪早年已否認片中人是自己,日前,她向法庭入稟指控李力持誹謗,指對方評論構成誹謗及惡意虛構言論,要求法庭頒下禁制令。
【梁思浩傷口灑鹽】
廢老思想和言行非常人能理解,盧覓雪日前接受《蘋果》訪問時,坦言對方非自己朋友,對方涉誹謗,直接告上法庭還自己公道便可,手起刀落絕不姑息;反而事件的後續更讓盧覓雪感到憤怒和心寒,講起相識多年的梁思浩的所作所為,即使事隔數月,盧覓雪依然氣難下意難平:「如果我唔識梁思浩,我唔會咁嬲同失望,佢喺facebook話叫人唔好再send段片畀佢睇,話嘔咗4次。咁既然你嘔4次,即係你已經睇咗4次啦,咁點解你睇完第一次仲要睇呢?」
盧覓雪指對方奚落她之餘,還含沙射影提到當年流出艷照的女星:「我呢啲年老色衰唔好睇,嗰啲正啦,卜卜脆,佢講呢啲嘢,可以睇到呢個人衰到有幾交關,虛偽到呢,佢喺你面前真係honey、darling咁嗌你錫你攬你,有事相求乜都得。嘩!轉個背可以咁樣。話我之餘,佢仲拉埋另外兩個女星落水,躺着也中槍,就知呢個人踐踏女性係幾咁不遺餘力。」事件發生後,盧覓雪坦言出街會疑神疑鬼胡思亂想,與途人擦身而過時,亦會懷疑對方的目光,整整一個禮拜瞓覺會扎醒,最後要見心理醫生。盧覓雪自覺5年前同樣問題發生時,自己只是「哈哈」兩聲瀟灑面對,但今次反應如此之大,她認為是社會變了、人心變了,關係變得複雜和撕裂。
【黃色有品味好多】
對於去年社會運動和年初的疫情,盧覓雪坦言作為香港人,有很深的體會。「其實佔中之後,大家迫住你要有一個所謂嘅立場,等如李力持鬧嗰個死黃絲,即係佢係藍絲啦,佢又知我係黃絲?我從來都冇表過任何態,可能佢覺得我同杜汶澤一齊做節目,點會唔係黃絲?呢種上綱上線將所有嘢扭曲晒嘅諗法,即係你打得呢份工,就一定要扣你帽子。不過又咁講,你得黃同藍,唔使講我一定係黃㗎啦,有品味好多,你睇吓啲文宣先啦,你睇吓啲藍,唔通你叫我企喺李偲嫣側邊咩,我驚佢搶鏡過我。民建聯,佢個全名都用民主掛帥㗎,不過大部份正常嘅、有獨立思考嘅人,點解覺得民建聯係禮義廉?嗱!佢哋呢啲真係要檢討,我都幾肯定民建聯唔係我同路人囉!」
【中學時代遭欺凌】
遇到不公義時,盧覓雪選擇不平則鳴,被人惡意中傷存心「老屈」,誓追求到底,回想中學年代,她亦試過被人恰的日子,學校欺凌,的確不分年代、不分banding。「細細個已經一餐食三碗飯,被人叫『肥妹』叫到大,而家當然知係被標籤嘅一種,但嗰時唔覺得係被欺凌。雖然我好大份,但細個運動好叻,仲入埋排球校隊,記得有一日放學換衫落操場打波,打完諗住換衫時,發現書包同校服裙唔見咗,其他人就冇唔見,卒之喺條平時冇乜人行嘅後樓梯,見到書包同書散落一地,但始終搵唔返條裙。到我大咗之後,就知有人應該唔抵得一個肥妹可以入到排球隊。」
聽盧覓雪所言,多年來由於一個「肥」字,不止一次遭人歧視或戴有色眼鏡對待。她做記者時,就聽過比粗口更難聽的說話:「嗰時做記者,好多人着到好似林亞珍咁,有日我着條入膊白色裙,喺電視台遇到一個好熟嘅男藝人,佢第一句問我係咪去飲,做乜着到『飲樣』咁,我話唔係,佢見有人行入嚟,就捉住啲人話『喂喂,你哋睇吓佢……!』」經此事後,盧覓雪和這位男藝人亦不相往還。
被人當馬騮般看待,盧覓雪深知又是關自己身形事:「一定係針對我肥,肥人應該要死㗎啦,仲要去打扮?咩人嚟㗎!其實大部份人都好歧視肥人,但唔會歧視瘦人喎,人嘅價值觀都係俾市場學去扭曲咗,心諗肥有咩罪啫,同黑人有咩罪啫一樣,如果你仲介意人哋黑定白定黃,肥瘦高矮定四眼,任何嘢都可以標籤化,咁唔係你讀幾多書嘅問題,係你無知嘅問題。」
【阮兆祥好大膽】
不要以為盧覓雪不懂幽默下下上火,只要不超越她的底線,玩起上來絕對是大癲大肺的,正如有網民提到她在《喱騷》被阿澤窒,戥她可憐。當事人卻不以為然。「你要搞清楚,呢個唔係真取笑,只係為咗戲劇效果,私底下如果你係針對我,我都唔會去做呢啲無謂嘢啦,我好清楚,就算醜化,但其實只係大家共鳴嘅笑點,喺我角度完全冇問題,就好似10幾年前阮兆祥扮我,有記者問我介唔介意俾佢醜化,我直程覺得佢大膽啦,因為人哋唔知你扮緊邊個人,係唔識笑㗎嘛,佢竟然搵一個唔算出名嘅人嚟扮,咁呢啲唔係醜化,係叫做抬舉囉!」
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
empty
empty
盧覓雪自言一個「肥」字,多年來受盡不少人冷眼。
empty
回憶在中學的生活,盧覓雪坦言大部份時間是開心的。
empty
她認為任何事都可以標籤化,就算高學歷的人亦會有無知的一面。
empty
盧覓雪不齒梁思浩落井下石的行為。(資料圖片)
empty
盧覓雪坦言和李力持並非朋友,但估唔到做過同事的梁思浩竟然會在她身上傷口灑鹽。(資料圖片)
empty
盧覓雪直言欣賞好友阮兆祥的勇氣。(資料圖片)
empty
日前盧覓雪入稟指控李力持誹謗。(電影截圖)
empty
盧覓雪不介意在電影中扮演醜角,直言只是增加喜劇效果。(資料圖片)