【收市閒情】我話OK就OK!港鐵,真係一隻好股(千頌C)
收市閒情千頌C港鐵
港鐵(066)因為signal wrong炒車迎頭相撞,一撞就撞出通車40年來第一撞,你以為佢之後條路好難行?嘿嘿!你唔見佢個就撞出一個「黃金交叉」!大家都知,喺股價圖見到「黃金交叉」就知係利好訊號,港鐵,真係一隻好股!點好法?我話OK就OK啦!
首先,大家如果見到港鐵有個「鐵」字,就以為鐵路係佢主業,咁你就真係識條鐵了,搞地鐵真正主業當然係「地」!睇返上年全年業績,客運業務收入冇錯係最高,有195億元,佔總收入達36%,不過利潤貢獻就只有14%;至於貢獻最大利潤嘅業務,就當然係車站商務,佔比又係36%,但睇佢收入,只係64.6億元,佔整體收入只有12%。都仲未計埋香港物業發展同租賃!根本港鐵有超過八成盈利都係地產相關,地產margin高咁多,畀著你都寧願做地產啦。
咁個個都搞地產,咁點解港鐵冇得輸呢?無他,佢贏在起跑線。當年港英政府起地鐵,又唔想注資,於是就同地鐵講,「U add oil la,總之鐵路沿線,啲地就交畀你去搞啦!」本來已有土地發展權,後來為咗整治九鐵,要兩鐵合併,九鐵資產同土地,就半賣半送咁畀埋地鐵管。成功靠父幹,有港府呢個大後台,成功養起咗呢個超級地產公司。只要有新鐵,就會有新盤。
再無敵嘅係,港府要兩鐵合併呀嘛,咁一個香港,只有一個港鐵,以後要發展鐵路基建,就只可以依賴港鐵。目前港鐵每日乘客近500萬,但公共交通市佔率,已經由2014年嘅48.1%,升到現時49.3%,要到五成就指日可待!依家香港人口越來越多,每日150個單程證,土地、鐵路幾乎飽和。
乘客多,就要起新線,獨家嘅!
有新線,就可以起樓,老馮嘅!
鐵路上蓋呀!超黃金地段!
咁樣港鐵邊有得輸呀?再講,就算鐵路運作得差,有咩後果呢?上年港府全年只係罰咗2000萬咋,就算山竹全部冧檔都只係2000萬。對港鐵來講,2000萬算係咩錢?鐵路真正係咩作用?係要來發展地產。運作成點,行到就得啦,拎錢畀心機搞地產好過。今年市場預計私樓新盤推售有32000幾個,港鐵就佔6300幾,佔比兩成。所以你見到啦,港鐵星期五破頂見48蚊,股價出事後低開後拗腰彈,周二繼續有得升。港鐵信號不穩嗎?但股價準備破頂信號穩就OK了,都話我話OK就OK啦!