全面化身做「鍵盤戰士」嘅前特首梁振英，唔知係咪咁要喺fb刷存在感展示自己「功績」嚟圍爐取暖，噚日就公告「我剛剛發出的一封信」，睇真啲原來係學人篤灰，矛頭直指香港華人基督教聯會真道書院嘅助理校長戴健暉，但佢就辣着一班校友同學生，齊齊聲討689。

呢位助理校長做咗乜要令689出手？原來網上近日流傳一個賬號「Alvin Tai」嘅fb截圖，涉罵警言論，例如「祝福」警員嘅仔女「過唔到7歲」，等班警員感受被打青年父母嗰種切身之痛。

以前特首兼領導人身份撻朵

向來撐警嘅689好似執到寶咁，用「前行政長官＋全國政協副主席」身份寫信向真道書院校監鍾嘉樂告發兼施壓，話戴老師言詞唔止令「全香港社會震驚」，仲係「全球教育界之恥」，要校方即刻革除戴助理校長以儆效尤喎。

結果校方喺689壓力下，發咗聲明譴責戴老師，又表明校董會將嚴肅跟進，戴老師之後亦喺fb道歉同收回不當言論，不過689做法辣着一眾學生同校友，戥戴老師唔抵於是開腔撐佢，大讚佢教學認真盡責，係不可多得嘅良師，亦冇喺校園散播任何仇恨情緒。班學生同校友仲聯署要求校方譴責呢股肆意抹黑嘅「歪風」，八方就覺得網友留言形容得最好：「無聊嘅人得閒就會成日做埋啲無聊嘅事，仲要騷擾到人哋」，完！