噚晚《殺破狼II》喺荃灣舉行宣傳活動，黃柏高、吳京、張晉、盧惠光、蔡瀚億、姜皓文、張馳同埋唱主題曲嘅新加坡歌手謝中傑全男班現身，大會安排佢哋同觀眾玩遊戲，張晉仲教啲觀眾擺功夫甫士，場面搞笑。

同樣已為人父嘅吳京同張晉，被問到會唔會畀老婆仔女去睇《殺破狼II》？吳京笑言拍戲時捱起碼五百腳，創下動作演員捱打紀錄，所以佢話：「一定要畀老婆睇，等佢知道老公做嘢好辛苦，囝囝都要睇，等佢睇到係邊個打爸爸，大個要打返佢。」但係張晉唔畀女女睇：「Ada（蔡少芬）就一定心急想睇，不過囡囡唔好啦，佢都係睇返公主嗰啲得啦，未啱佢睇住。」

拍《殺破狼II》嗰陣，個個演員都有受過傷，張晉話自己有場戲被TonyJaa用大髀頂個助骨，搞到個肋骨裂咗。佢又講笑話導演鄭保瑞，唔希望啲老婆嚟探班：「我又試過被TonyJaa用手踭打爆頭，真係眼前一黑，呢啲唔可以畀佢喺現場睇到。」

佢仲話戲中飾演大反派，見到TonyJaa個女嘅戲份，就諗起自己個女，覺得戲中嘅自己好衰：「每晚返屋企，由片場返去得十五分鐘，入屋要攬住個女，心理要變得好快。」

至於吳京，佢就話自己唔會因為有老婆同囝囝，而特別鍚身，堅持親身上陣：「唔通觀眾入場睇替身咩？小心啲囉，命唔可以賭，我會記住有老婆、有家庭、有仔女，見到佢地就要做好安全。」佢又透露計劃投資動作片，佢當然會演出，又力邀張晉齊齊拍，希望將學咗廿幾年嘅功夫使出嚟，當係圓夢喎。