大約1個月前金榜（172）宣布出售旺角金都商場，放棄呢個咁有租務價值嘅特色商場，原來係有後着，公司發出通告，宣布委任中信集團前主席王軍為主席兼執行董事，即日生效。王軍目前係保利香港（119）及中信21世紀（241）主席；另出任香港建設（190）名譽主席及中通服務（552）獨立非執行董事，𠵱家再沾手多1間上市公司。
受到消息刺激，金榜股價噚日急升1.6倍，成交額亦都好誇張，達到5.8億銀，上咗10大成交金額榜，正式係「金榜題名」。金榜連同出售金都商場予美林旗下基金及出售南京商場套現所得，手持超過6億銀，還咗按揭之後仲有好多現金，1隻搞到咁亁淨嘅殼，同早前狂炒嘅金匡（286）有得比。
一間變成現金股嘅淨殼，下一步一定要宣布投資大計，否則便唔符合當初上市有持續經營業務嘅條款，至於轉型大計，近期最熱一定係轉做資源、能源同埋各類礦務，其次就輪到環保以及國內水務行業。
睇返王軍已沾手嘅公司，旗下已有香港建設做風力發電，保利則做地產，中信21世紀做質檢網，惟獨近期最炒得起嘅資源業務未有，金榜噚日炒得咁勁，或者同市場憧憬佢轉型搞資源同能源有關。金榜昨市值增至12億元，相比一啲炒至過百億市值嘅礦務股未算好高，要昅實呢間公司仲有乜大計。

紡織股恒富控股（643）日前披露獲股壇長毛DavidWebb於上月底以每股平均價0.888元買入80萬股，持股逾5%，刺激股價升13%，收0.93元，比起DavidWebb呢次入貨價唔係高好多。呢隻冷門工業股，早前公布06年業績，溢利6811萬元，增3.65%，每股盈利18.88仙，末期息6仙，連中期息共9仙。照價計，現年PE不足5倍，股息率達10厘，收息高過唔少收租股同REIT，難怪會獲DavidWebb睇中。