今日係天皇巨星米高積遜（MJ）離開大家五周年日子，港台今日就播出曾經同MJ有接觸過嘅李玟（Coco）錄音訪問。

Coco大讚MJ係一位傳奇人物，係一位才子，完全冇學過音樂，都可以寫出咁多好歌，節奏感又強，每隻舞蹈都令人回味，佢自爆當年第一次聽到MJ音樂，經已一見鍾情。

多年後Coco首次去韓國演出，同場仲有MJ，Coco話：「因為我經理人係MJ之前經理人，所以佢問我想唔想見MJ，我話梗係想，當我入到佢間房時，佢問我叫咩名，然後就不停哼住我個名，佢好親切，幾年後我有機會去佢屋企NEVERLAND。」

Coco記得MJ著住好華麗絲質睡袍，裏面穿白恤衫加西褲同拖鞋，MJ好熱情招呼佢哋，當自己屋企一樣，佢話：「當時MJ皮膚有啲問題，佢問我可以搽啲乜。」

當日佢仲有機會聽到MJ製作中嘅《Thriller》Remix版，Coco指MJ對工作好有熱誠，可能大家覺得佢成日似唔開心，其實MJ腦海中係不停諗緊工作嘅嘢。

Coco仲爆咗一件MJ怕醜事，有次一大班人去到另一位朋友屋企，MJ就坐喺樓梯，喺欄河之間偷望下層一大班玩緊嘅女仔朋友，呢點就係佢單純可愛一面。