鄭融、劉浩龍同鍾舒漫等人今日喺中環出席回歸派對，呢次喺戶外表演，鄭融話喺街頭表演氣氛仲好。對於習近平呢幾日來港，令多處封路引致交通濟塞，佢話都預算會咁樣，而平時佢好多時候都會搭交通工具：「唔會著做騷既衫搭港鐵，搭港鐵好似過正常生活，平衡一下，拍拖都搭，我男友六呎高，可以遮住我。」

劉浩龍與舊愛鄭融同場，但前後腳到，劉浩龍話做嘢唔使特別向女友容祖兒備案：「仲講呢啲？絕對冇問題，都係做嘢啫，咁耐嘅事，大家係朋友。」另外，佢話回歸20年，其實對佢都有特別意義，因為佢97年參加新秀。相隔一年半再錄音，但係就唔多開心：「把聲生銹，三日都錄唔到一首歌，前日仲啞咗。」佢話有搵唱歌老師幫佢開聲，問佢有冇搵祖兒幫手，佢話：「有叫佢幫手呀，佢都係好好嘅老師。」

另外，鍾舒漫剛喺上海返嚟，同妹妹鍾舒淇、舊愛吳浩康出席hair Show，佢話同舊愛見面冇尷尬：「冇，佢有俾新歌我聽，我期待佢既音樂會。」而佢返香港時，安檢搞咗好耐，遲咗check in冇得上機，好彩阿妹幫手搞候補機位，仲話平時阿妹係自己守護天使。