馬浚偉今日邀請查小欣擔任其節目《偶然·馬浚偉》嘅嘉賓，馬仔透露剛喺廣州完成舞台劇《偶然。徐志摩》演出，由於反應好好，佢感覺觀眾嘅歡呼聲令佢好似走完一生咁，而10月同11月準備分別到上海及廈門繼續巡演，佢話：「最開心受邀請，代表香港參加10月嘅第十九屆中國上海國際藝術節。」有冇壓力？馬仔話：「冇喎，反而興奮多啲。」

至於《偶然。徐志摩》香港站，馬仔表示好大機會下年喺香港重演，佢繼續飾演徐志摩，但其他演員，就全新班底，馬仔話會邀請胡定欣飾演一角。此外，馬仔最近成立一間全非牟利嘅主創藝術坊，目標係俾熱愛舞台嘅弱勢社群參與。