揸車要窄路掉頭，有時真係好考司機嘅功夫。好似上周五（20號）傍晚6點幾，有個司機揸住部白色豐田Corolla私家車，喺觀塘海濱道萬兆豐中心後巷，諗住窄路掉頭返大路，結果佢扭咗最少十分鐘軚先掉到頭，最慘係駛前撞鐵欄、退後撞鐵柱先甩到身，搞到部車花晒，真係陰功豬！
鍾先生當時喺對面大廈停車場攞車，咁啱睇到呢幕，佢話初時見到部白色車「咦？點解咁得意打橫霸咗條後巷嘅？」於是拍咗片。鍾先生話呢條後巷係單程路，周不時有司機偷雞泊車。

前撞欄後撞柱

片段見到條後巷真係幾窄，仲有車泊埋上壆，剩低嘅路啱啱夠一架貨Van駛過。當時部白色Corolla前面泊咗架銀色七人車，架Corolla想喺度掉頭，個司機不斷扭軚、駛前又退後，數唔清佢究竟扭咗幾多手軚，舞來舞去都唔掂。後嚟個司機好似唔理咁多，照退後由得車尾撞鐵柱，仲駛前撞鐵欄，撞爆埋左邊車頭泵把；其間右邊車轆揩到柱，佢仲落車睇㖭，幾經辛苦終於掉到頭。
最神奇嘅係個司機雖然退來退去，幾次差啲揩到架七人車，但最後都無撞到嘅，要傷都係傷自己部車箒，都算係咁嘞。鍾先生話覺得個司機係新手，平日見入咗去後巷嘅車，都係直駛退返出去海濱道，唔會掉頭。呢件事令佢諗起早前有部的士駛咗入山頂盧吉道，都係撞到花晒先出返嚟喎。
今年大年初二清晨，有個的士司機駛咗入有「仙橋霧鎖」之稱、仲係行車禁區嘅山頂盧吉道，結果駛到每個彎位都卡住，多次撞欄仲爆埋胎，最後要拖車到場花3個鐘先將部的士救離險境，警方票控咗司機擅闖禁區。