年前發生連串襲警案，曾觸發警員要求巡更時一定要行「雙咇」，以保人身安全；同樣最近發生嘅鳳姐謀殺案，亦激發一向行「單咇」嘅「一樓一」性工作者，爭取行「雙咇」甚至「多咇」嘅權利……

主持楊卓華：其實目前法例容許「一樓一」方式賣淫，但就限制多過一個人嘅集團式經營，好多人覺得係一個平衡，點解你認為要改法例？

主持高明輝：照你咁講，只要解決到警方執法嘅公平同態度問題，基本上法例就冇乜需要改動？

林：如果冇咗呢啲法例，咁警察咪冇得用呢啲法例去搞佢哋囉……點解啲「姐仔」成日俾人殺、俾人斬？就係因為我哋個社會，當有人提到畀多啲保障佢哋，大家就會視為洪水猛獸。

楊：其實好多人並唔係特別歧視「姐仔」，有調查亦顯示大部份人贊成設立紅燈區，只就係擔心放寬「一樓一」之後，色情場所會喺自己屋企附近開到成行成市。

林：會否成行成市只係供求嘅問題，其實任何社會，無論你畀佢做，唔畀佢做，（娼妓）個數目係冇乜分別嘅。個社會自然會平衡，如果Supply（供應）太多，個Demand（需求）唔夠的話，好多（色場場所）會執笠。

高：今次其中一個疑兇係南亞裔人士，聽聞有「姐仔」為保安全，拒絕接南亞裔嘅客人。不過，最近有團體主張設立反種族歧視法，話唔可以歧視唔同種族嘅人，你覺唔覺得會剝奪咗姐仔透過篩選客人來保護自己嘅權利？

林：我支持反種族歧視法……唔可以話你（性工作者）憎非洲人，就唔做佢哋生意。

楊：一方面主張放寬管制賣淫嘅條例，主張要由市場決定供求，但另一方面就支持為反種族歧視立法，限制咗姐仔透過揀客來保護自己嘅權利，我覺得邏輯上有啲古怪……