一年一度嘅影視娛樂博覽今日繼續喺會展舉行，今朝古天樂、林家棟、任賢齊、許瑋甯同火火等人，出席太陽娛樂文化 X 非凡娛樂電影項目發佈會，佢哋今年將會開拍4套電影，家棟今年將會以監製、編劇同演員身份，參與《滅相》同《殊途同歸》，鄭保瑞會聯同黃柏高監製《逆火英雄》，火火就會為《奇幻民宿》執導。

全場嘅焦點當然喺古天樂嘅身上，今次古仔憑電影《殺破狼-貪狼》，先後喺亞洲電影節同第12屆香港電影導演會年度大獎中奪得最佳男主角，司儀喺台上問佢有冇信心喺金像獎攞獎，實行三連霸，古仔就話：「多謝！」許瑋甯一向視古仔係男神，佢話知道佢拎獎，當然好戥佢開心，而且仲好榮幸可以合作。

許瑋甯同古天樂今次喺《滅相》合作，大家會有感情線，唔知會唔會有親熱戲？許瑋甯話：「看劇本安排，不過未見有，希望工作上希望有更多合作，大家多了解！」佢仲話呢套戲會喺下半年開拍，到時會有1個半月左右喺香港開工，之後又會返台灣取景，唔知男友又會唔會嚟探班？許瑋甯就話：「工作嘛，不會吧！」之後又有人問許瑋甯會否介意同前男友阮經天喺電影上有合作，經理人即刻就話會思考一下，許瑋甯就話交俾公司安排！

身兼三職嘅林家棟，唔知今次會唔會收多啲錢？點知佢話：「冇諗，其實連合約都未簽，不過好多謝投資方俾新嘗試，我希望可以做好啲！」講到《殊途同歸》係繼《樹大招風》後，同任賢齊、陳小春一齊再合作，家棟話：「其實第一時間就諗起小齊，所以即刻打俾佢去，點知收線隔咗15分鐘，小齊已經嚟咗一齊傾！」

家棟仲話：「成件事最辛苦喺聖誕節患上乙型流感，嗰陣即刻叫公司同事清場，佢哋都覺得奇怪，查實我係想喺公司自我隔離，可以一個人靜靜地搞劇本，但係又唔會傳染到人！」小齊就話今次再同家棟合作好開心，問佢有冇恭喜黎明做爸爸，佢就話：「呢兩日忙住電影博覽嘅事，冇留意新聞，真係要搵個時間恭喜佢。」至於會唔會傳授啲湊仔心得，小齊話：「我自己都唔係太好，雞手鴨腳！」

精選娛聞，喺晒《娛果》
http://fb.com/appledailyent