J.Arie棄律師筍工做創作歌手 無悔戶口僅餘80元堅持理想
雷深如J.Arie律師創作歌手
J.Arie日前接受商台《1圈圈星光背後》專訪,剖白由才女變「性女」之轉變,與及入行9年的爭扎。她說:「人家封我性女,我好鍾意亦想做好耐。2016年我有首歌《天秤先生》曾經想用性做題材,但礙於有公司就有掣肘,認為女歌手要斯文着長裙要背負形象。其實性係好正常嘅事,點解唔講得?好開心今次冇乜負評,雖然有人認為我應該隱晦啲,但我就係想咁坦蕩蕩。」
鋼琴達八級的J.Arie當年出道,曾被包裝成唱作才女,但隨着太陽娛樂及黃柏高將事業重心轉為電影,她坦言約滿離巢前數年有不少迷惘及矛盾:「從來冇穩定收入,攞新人獎頭1、2年好啲,最迷惘係2014年後,開始幾年冇碟出,之後派單曲,嗰時Paco買咗批好好聽嘅韓國歌,改編成電影主題曲畀我唱,但最初公司係sell我創作,嗰啲歌網上好受歡迎,但作曲又唔係我,古仔又唔關我事,我上電台宣傳,真係唔知可以講咩,呢樣最矛盾。」
不過,J.Arie由衷感激Paco及太陽娛樂對她的栽培。去年決心轉做獨立歌手,J.Arie坦言:「以前或者一個月有幾千蚊收入,但上年全行都停,試過幾個月零收入,戶口得80蚊。而家在做歌成本每首起碼10萬,我係一蚊一蚊儲返嚟,會幫人作曲同幫人補英文,盡量減少支出,係辛苦,但呢兩年啲歌全部係我想做。」
J.Arie成長於小康之家,當年大學畢業棄律師工作做歌手,遭到父母極力反對,問到經濟上父母曾否申出援手?她直言:「入行以嚟從未要過父母一分一毫,我知道佢哋會擔心我,有時會腰潤我『你睇吓細佬做咗律師幾happy,要不要塞你幾千蚊使?』我就係咁硬頸,就係唔要。我由10幾歲開始問,一個人成功係咪得一條路?女仔係咪一定要搵份穩定好工,之後再喺公司識個老公,再結婚組織家庭就係是美滿?我明白做律師絕對有幾萬以上收入,而家我可能每月得幾千,但我而家夠使,做到自己鍾意嘅音樂,我係從未如此開心過。」
J.Arie入行9年幾經艱辛,在音樂路上曾獲過獎項。(資料圖片)
-----------------------------
-----------------------------