李蕙敏(Amanda)憑一把獨特低沉嗓子獨步逕走樂壇，由於聲線有如飽歷風霜，為她度身訂造的歌曲也帶點悲情感，當中一句「一刀插入你心……」奠定咗佢「悲情天后」嘅地位。

Amanda喺15歲嘅時候，參加歡樂今宵嘅「SING星聲歌唱比賽」，當時佢唱梅艷芳嘅歌而受注目，17歲Amanda就俾著名音樂人倫永亮發掘，加入樂壇。88年，佢同區海倫組成女子組合Echo，至92年，有傳佢哋不和而令唱片銷量下滑而拆伙。

95年Amanda作單飛發展，兩年內佢共推出七張專輯，當中以《橫濱別戀》內一首《活得比你好》漸露鋒頭，再憑《秘密》內的《（你沒有）好結果》一炮而紅，兩首歌都由黃偉文填詞，講盡分手後女方嘅悲情，其中《（你沒有）好結果》嘅「等，欣賞你被某君，一刀插入你心，加點眼淚陪襯…」赤裸裸咁寫出女方被舊情人拋棄嘅怨恨，唱到街知巷聞，96年，佢再推出一首《我為我生存》，被喻為Amanda嘅「怨婦歌曲系列第三部曲」，亦奠定咗佢「悲情天后」地位。