【新增動新聞】
前年特首林鄭月娥參選嘅時候，用「We Connect」做競選口號，估唔到短短兩年，佢真係兌現咗呢個承諾，只係connect咗嘅人並唔包括佢啫。一場反送中運動成功團結咗大量香港人，好似向來唔鍾意基督徒嘅連登仔今鋪都有所改觀，佢哋仲相當有智慧咁分析到，嚟緊最重要就係打民意戰，目標仲要係一眾平時撐開政府嘅中老年藍絲，於是《保民生．反修例．大聯盟》就應運而生。

立法會已經3日冇開大會，隨住日前警察暴力清場後，呢兩日嘅氣氛詭異地平靜，有連登仔聞到件事有古怪，亦擔心政府正醞釀民意戰反攻，所以決定先發制人，準備向中老年藍絲發動反送中民意戰。

所謂百貨應百客，要令中老年藍絲明白送中惡法問題所在，一定要用番佢哋嘅語言。唔少連登仔相當有心，製作大量適合中老年藍絲口味嘅長輩圖，深入淺出痛陳惡法之弊，而內容一針見血，例如指出通過惡法會令樓市股市玩完、助長美帝氣焰等，再者中國駐英大事劉曉明都話，中央從未指示香港修例，仲唔係證明成單嘢都係林鄭一手搞出嚟，旨在搞冧香港、拖垮中央。

《大聯盟》呼籲大家落區擺街站宣傳，多啲同中老年藍絲解釋。八方好欣賞連登仔出心出力，為咗略盡綿力，咁就幫手輕輕一推。

-----------------------------
【新聞有價】6月17日起 繼續撐蘋果
http://bit.ly/2IJ24ZR