臨近年尾，電台、電視台好多時用獎項吸引人氣歌手出席頒獎禮，呢招喺財經論壇都可能使得。
和訊網噚日在港舉辦論壇，中資券商國泰君安、海通、建銀國際、光控老總全部畀面撐場，仲要有獎攞。
財經論壇一般只係嘉賓上台演說，和訊呢個喺下午舉行嘅論壇，除嘉賓發言，仲有兩個頒獎環節，設有九組獎項，包括最佳投資移民服務商、最佳中資投行，其中一組係「財經風雲人物」，得獎者係建銀國際總裁胡章宏、光大控股（165）CEO陳爽、國泰君安主席閰峰、海通CEO林涌同民生（1988）香港行長林治洪。
五位當然係財經界有地位嘅人物，風雲與否就見仁見智，不過大家應該冇去深究五位得獎嘅原因，總之佢哋現身就得。攞完獎，佢哋就閃人了。
論壇雲集一班中資券商老總，討論題目自然關於香港與內地嘅競爭優勢，佢哋亦唔會踩自己。

中銀保誠董事長謝湧海好唔客氣咁批評，指香港唔應該再強調開放、專業人才係香港優勢，事關上海嘅金融人才已經超過香港。佢認為，香港政府應該腳踏實地，做更多調研工作，了解點解有啲地方會輸畀新加坡，再搵改善方法。
林涌就引述一位來自內地、已取得香港身份證嘅同事嘅分析，指「香港人非常有規則，但不敢對規則有創新想法；大陸人有理想，但缺乏對規則的尊重」都幾一針見血。

李華華
mailto:[email protected]

足本收睇《亂噏24》x鄭秀文@杜琪峯；DADA閃電復出後首次專訪！
周一至周五《亂噏24》約定你： http://bit.ly/appletalk24