日本樂壇天后宇多田光同第二任意大利籍軟飯老公Francesco Calliano離婚收場，適逢佢入行20周年，本月27日將推出過檔Sony後全新專輯《初戀》，收錄歌曲包括《花過天晴~花男Next Season》主題曲《初戀》、其代言飲品廣告歌《Play A Love Song》、堺雅人主演電影《鎌倉物語》主題曲《你》等共12曲，當中《初戀》一曲已在各地供收費下載，更高踞iTunes下載榜，約兩分鐘MV在YouTube公開後已破100萬次觀看紀錄。

及至年底，光妹會展開相隔12年嘅巡迴演唱會「宇多田光 CONCERT TOUR 2018」，11月6日開始喺橫濱Arena開鑼，暫定開12場，原來到時佢亦有意舉辦首次亞洲巡唱，更有可能唱到香港及台灣等地！光妹於15歲發行出道單曲《Automatic》大賣逾200萬張，又為日劇《魔女之條件》唱出主題曲《First Love》紅遍亞洲，處女專輯錄得765萬張之驚人銷量，又創下連續七張專輯破百萬銷量、擁有五張百萬單曲，而日本史上最高銷量嘅十大專輯中，就有三張係光妹作品。

據台灣《蘋果日報》透露，明年將有多位國際紅星接棒到台灣開騷，根據明年上半年台北小巨蛋檔期，光妹、日本勁旅Mr.Children、美國流行天王Justin Timberlake都在登記名單上，三組紅人或有機會舉行亞洲巡演，如果落實肯定又掀撲飛熱。

精選娛聞，喺晒《娛果》
http://fb.com/appledailyent