徐雨石這天殺得性起，第四場憑「金貴人」擸完從練第300W後，第五場馬上再贏「皇龍大師」起孖。此駒上仗由韋達贏谷草千八開齋，今勻轉戰田草二千，因韋達去咗杜拜跑世界盃，未趕得切返嚟，所以幕後一早搵定何澤堯幫手，結果畀佢執隻熱煎堆，影相險勝「龍之欣」揚威三T次關。「皇龍大師」連捷得手，造就徐雨石一手包辦第四口孖寶，馬主皇仁仔區啟光今季已經執咗三場頭馬，另一Ｗ是「皇龍寶駒」，賽後區啟光身旁一位友人大晒彩票，似乎大有斬獲。何澤堯上個禮拜日停賽復出，跑完呢日又要停賽，好彩贏「皇龍大師」有收穫，咁啱今場同佢串Q「龍之欣」亦是冷門，加埋三、四名「長勝勇將」及「辣得醒」在內，呢條華倉四重彩派16.6萬元，和味得很！