韓國女團TWICE台灣成員周子瑜因為被指係台獨分子，之後「被中國人」及「被道歉」，而子瑜所屬嘅JYP事務所又於大前日於官網將子瑜嘅出生地改為「中國台灣」，立即引起網民強烈反對，而JYP嘅官網亦隨即遭到黑客攻擊。過咗咁多日，JYP今日先搵人出嚟回應，表示：「周子瑜公開道歉前，官網就出現間接性癱瘓情況，我哋修復過，但係16日因為不特定IP跟隨機IP嘅黑客攻擊，令官網出現中斷現象。為咗修復官網，我哋正努力中，需要花啲時間，預計將於今、明兩日內修復，至於係由邊度受到攻擊，於技術上係無法知曉嘅。」

其實JYP唔洗估啦，因此台灣黑客一早於噚日已經承認責任。噚日下晝國際黑客組織匿名者台灣分部（AnonymousTw）承認癱瘓JYP官網，留言：「對於JYP官方網站上，台灣藝人周子瑜小姐的國藉，被強迫改成中國台灣一事，我們通知韓國官方盡快改台臺灣，癱瘓網頁只是台灣人民呐喊的開端，若不重視這通知，你們必將自取滅亡，台灣必定會讓你見識到全民抵制的力量。」今日又留言強調:「我們只希望JYPE公司發表聲明對此事負責，並對子瑜作出一個道歉！」

不過JYP未有就事件回應，而截至現時，JYP官網依然癱瘓。