特首選戰大局塵埃落定，三名可以入閘嘅候選人，提名名單已經曝光，八方細心對一對，民主派「300＋」選委瞓身撐薯片叔同胡國興之際，都有部份選委保持清白之身，其中喺30席嘅資訊科技界，只有一位選委冇提名，就係公民黨嘅陳宇明。

八方問過Jackal，佢話上星期都透露過，如果社民連梁國雄夠公民提名，係會畀票佢，但長毛上周六宣佈因為唔夠公提而棄選後，佢就喺民主動力舉辦嘅商討日活動中，即場交提名畀胡國興，但同對方講明，如果夠提名嘅話，可以退返畀佢。最終佢都係今日先發現，胡官冇交佢個提名報名，相信因為夠票在手。

Jackal坦言現時三個候選人中，「三個都揀唔落手」；至於會唔會投白票？佢話要視乎當時情況再研究投票策略，例如使唔使進行第二輪投票呢？暫時冇定，稍後要再同公民黨及「300＋」商討。