日前「蘋果」率先報道TVBI大裁員，之後，無綫亦會大裁員，掌管非戲劇科嘅余詠珊決定向體育組開刀，解散體育組約30人。

自1980年啟播嘅《體育世界》，今午12點播完最後一集之後，正式完成歷史任務，MyTV Super體育台亦只做到8月15日。

最後一集《體育世界》由李思雅、黃庭鋒主持。之前「方以文 睇電視喇喂」fb page已預告今集畫面顏色會整淡少少，睇落又真係好似校淡咗。

雖然係最後一集，但半小時節目裡，兩位主持未有道別之語。不過，到節目尾聲，播出《體育世界》熟悉的主題音樂，畫面緊接播出這節目38年來不同logo，之後歷代主持的精選片段飛快閃過，包括林嘉華、程思俊、陳秀珠、鍾志光、賴汝正、陳尚來、勞嘉琪、韓毓霞、鄧世勤、葉尚華、馬啟仁、林尚義、陳敏兒、潘宗明、梁頌恩，甚至戴耀明原來都做過《體育世界》記者，出動採訪。

38年就咁飛快走過，睇住畫面由昔日4:3變成今日16:9，當年一張張年輕面孔，朝氣勃勃，就同節目名一樣充滿拼勁！

節目最後一個定格，就係最後一代——即今《體育世界》班底大合照。

而《體育世界》非無綫官方fb( https://bit.ly/2tZQseg )，以下呢段文字，就好洋蔥：

「（請分享到你的FACEBOOK，陪著我們走到最後)
歡迎歡迎！歡迎收睇《體育世界》！
今日比較冷清d，得小編為大家主持

當個個都成日以為《體育世界》好耐之前就無咗，其實我哋仍然默默存在。
但嚟到今集《體育世界》，我哋真係正式大結局啦！
仲記唔記得我哋個首比「綠袖子」仲入腦嘅主題曲呀？
仲記唔記得細個嘅時候，一到周末就會坐係電視機面前睇住《體育世界》？
少年，你已經不再年輕了。

哎！傷心事唔講咁多！又暴露年齡
今集嚟到最後一集，話咁快嚟到尾聲，到咗最後嘅無獎問答遊戲時間，問題係：請列出最後一集體育世界中，最後出現嘅歷代主持名字。
（提示：片尾有彩蛋）

喂！係今日（7月7日）中午12點TVB【體育世界】呀！
聽聞片尾仲有彩蛋架！
有今生無來世，MyTVsuper無得重溫架，快d叫醒你個fd一齊睇啦！

好(拍一下手），呢個時候，小編最後嘅小小請求，希望大家能夠share呢個post，係最後嘅最後有更多嘅人陪伴節目走到最後一刻。感激！

＃係彩蛋唔係流彈
＃鵰
＃喂係個畫面有聲咋
＃音樂嚟架咪諗錯隔籬
＃直線又好曲線又好射得中咪得囉
＃維護香港體壇發展嘅重要任務要交番畀各位啦
＃我完成咗劃時代意義嘅重要歷史性任務啦
＃工已收
＃請開啟你的電視機
＃來讓我們笑著欣賞這結局
＃UNOFFICAL要講明
＃後會有期」

再見喇！！！