連登仔至愛科網女記者莉莉菇身世揭秘 媽咪係前港姐鍾慧冰
蘋果日報 2020/12/11 23:37
鍾慧冰莉莉菇連登星二代
近期一位名叫「莉莉菇」的生活科技資訊網站女記者大受連登仔歡迎，大讚她靚女之餘更想她做女朋友，原來這位24歲的靚女記者是星二代，母親正是1979年港姐季軍鍾慧冰女兒林靜莉（Jeannie）。《蘋果》今日向鍾慧冰了解，她笑說：「可能佢都唔想人知，佢其實係記者，唔係乜嘢女神。」
鍾慧冰表示，女兒任職記者差不多一年，由於女兒受連登仔歡迎，香港開電視於是索性邀女兒做主持，她說：「佢而家又啱啱喺香港開電視主持兒童節目，同埋一個美食節目，呢個月開始，開電視就係見佢喺啲乜嘢登（連登）幾受歡迎，佢平時就喺科技網做記者，周末就幫開電視做節目。」
問會否跟女兒一齊拍檔做節目？鍾慧冰笑說：「梗係唔會啦，我唔做㗎啦，我年紀咁大，60幾歲人，仲做乜鬼吖，要休息吓啦，同埋我3年前大病過（因身體免疫系統出問題而患上脈管炎），而家都唔係好返，不過好彩冇死到，行得走得食得，但我啲手手腳腳有啲位都唔係好好，會好攰同好痺，所以我唔會做㗎喇，同埋你靚嘅時候畀人見就話啫，而家咁老，人哋都唔想見你啦，有乜好睇啫。」
對於女兒人氣升有何睇法？鍾慧冰說：「佢又唔係想做明星嗰種人，其實佢做記者之前喺港龍做咗半年空姐，佢係好命，同佢同期受訓啲人全部都冇嘢做，大鑊到嘔。」鍾慧冰指女兒當了半年空姐後，昔日樹仁大學同學問她可有興趣到生活科技網做記者，由於女兒當年大學修讀新聞系，所以便試試看，結果一做就做了一年。
鍾慧冰又表示：「我而家已經out out 哋，啲科技嘢我都唔識，但我覺得佢有改進空間，我提醒佢講嘢有懶音。」記者指她女兒不像其他星二代借助父母名氣上位，鍾慧冰笑說：「我一樣嘢都冇幫過佢，係佢自己整返嚟。」
《蘋果》晚上聯絡到Jeannie，對於做科網記者，她短訊回覆說：「本身自己就喺樹仁讀新聞系，但剛畢業想free啲先，就去咗港龍做空姐，之後發現自己鍾意做啲更有趣，可以每日接觸更多新事物嘅工作，剛好有朋友介紹，咁我就去咗做記者了。」
問她是否刻意隱瞞媽咪是藝人，她解釋：「因為我崗位係記者，都希望大家可以focus喺我介紹或者實試嘅科技影片，希望大家可以睇完條片先知道更多資訊。另外自己都希望可以靠自己能力去發展自己嘅事業，唔希望會有其他因素去影響其他人對我既睇法或者質疑我嘅工作能力，其實我啲同事都唔知道我嘅背景。」
至於有沒有興趣學媽咪入行做藝人，Jeannie表示：「其實我由大學開始就好鍾意演戲，一直都希望可以成為演員，不只是電視劇電影，舞台劇我都非常享受。不過我認為藝人同演員係有分別，我只係想單純地做一個演員，專心地做戲，正如我而家專心咁主持。不過香港市場太細，亦好老實講自己外表並唔出眾，所以一直都冇一個機會去嘗試。但係如果有機會演戲我都會把握的。」
生活科技網女記者莉莉菇受不少男網民喜愛。（FB圖片）
莉莉菇2年前大學畢業後曾在港龍做過半年空姐。（FB圖片）
莉莉菇Jeanie樣子甜美。（FB圖片）
受連登仔喜愛的科技網女記者莉莉菇，原來是鍾慧冰獨生女。（FB圖片）
鍾慧冰指女兒Jeannie稍後會為開電視主持煮食和兒童節目。（FB圖片）
連登仔出post讚莉莉菇。（網上截圖）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！