火龍同狼人決戰大坑？一連三日嘅中秋舞火龍活動噚日踏入尾聲，今年意外地出現一名稀客，原來係飾演「狼人」聞名國際嘅影星曉治積曼（Hugh Jackman）。佢駕臨大坑做特別嘉賓，話呢世人未見過火龍，所以對一試舞龍珠感到好興奮，身形高大嘅佢舞起龍珠時功架十足，即使俾啲煙熏到眼紅紅都樂在其中。

查實曉治積曼咁啱來港宣傳新戲，佢好想體驗香港本地文化，所以旅發局邀請佢嚟大坑親歷一下。着住黑恤衫同西褲嘅佢傍晚8點幾抵埗，隨即引起全場哄動，表現親民嘅佢沿途同市民握手，又向市民講「你好」，佢話呢次係佢第3、4次來港，但參加中秋節活動都係第一次。
佢喺老師傅指導下試舞龍珠，舞得有板有眼，雖然搞到成身灰，眼睛仲畀煙熏到張唔開，但仍然面露笑容，事後仲用中文講「多謝」，話舞火龍呢個活動好amazing（令人驚嘆），大讚舞火龍嘅師傅好犀利，仲笑笑口問主持，火龍係咪會為佢帶嚟好運？不過，佢只係短暫逗留10幾分鐘就離去。