郭晉安今日到新城接受訪問，宣傳新劇《白色強人》，劇中演反派的他笑言看到不少網友留言指他演得夠奸，他稱今次的奸和以往有分別：「唔係為個人利益，觀眾慢慢會知道冤枉咗我。」講到有網友指姜大衛（John哥）的角色及演技演反派更勝一籌，安仔說：「兩個角色演繹方法唔同，佢嘅奸係比較含蓄。」更劇透說：「John哥因為絕症要做大手術，最後會昏迷，而幫佢做手術嘅係我，大家可以估吓我究竟係幫佢定害佢。」

安仔又大讚《白色強人》劇本夠大膽，例如食煙鏡頭會重現螢幕，他說：「劇本寫我要食煙，我拍嘅時候咪照食，雖然唔知會唔會刪剪咗。但拍攝時大家都以為我唔會食，所以當日現場冇準備煙，最終要問晒成個劇組，湊埋先夠20支，所以一定要喺20 Take內拍晒。」

問到一對仔女可有捧爸爸場？安仔話冇：「個女話怕血，囝囝話睇唔明，遲啲大個先一次過睇，仲話會睇晒我所有劇。」安仔透露稍後暑假會獨自帶囝囝歐遊20日，他說：「老婆要返夜學，囡囡又太細，今次是兩父子第一次出遊，就算要推咗幾多工作都要去，因為呢樣係囝囝出世時我已經應承咗。」

另外，新人黃進林（Michael）今日到新城宣傳首支單曲《分開紀念日》，他表示歌曲以初戀為題，今年23歲的他話初戀是最刻骨銘心，自己的發生在中二：「一齊咗3年，最難忘係一齊同班朋友去台灣旅行，後來因為對方去英國讀書，就維持唔到冇再聯絡，只係有時聽朋友講佢啲近況。」

目前單身的他笑言希望對方讀完書回來可以再續前緣，但現時想專心唱歌事業，亦在準備第二首歌。視洪卓立為偶像的他直言：「希望可以同佢合作。見過佢一次，佢好好人又高大。」

-----------------------------
你撐蘋果 我捐$1
支援反送中抗爭者