喺台灣出世嘅韓國女團TWICE成員周子瑜，因為舊年喺韓國節目揮舞中華民國國旗而俾黃安指為台獨分子，搞到佢比內地封殺，噚晚「被道歉」後，大陸網民喺JYP微博官網嘅留言已累積至22萬個，留言頁達11,143頁。幾乎絕大部份都是痛罵子瑜及JYP，包括指摘其讀稿沒誠意、滾出中國，以及要子瑜同JYP向全世界「澄清」，稱大陸網民根本冇「蝦」子瑜云云。

早前透過英皇向黃安發律師信嘅黃秋生，今午終於按捺不住，於fb怒轟：「仲想人哋點呀？都道咗歉啦，跳隻艷舞俾你哋睇好唔好？欺凌一個未成年少女到呢個程度，盡現兇殘。」

秋生接受《蘋果》電話訪問時，就謂：「調番轉頭嚟話佢(黃安)係台獨臥底都相信㗎！搞到而依咁樣，直情係幫蔡英文拉票啦。」

有香港網民在《蘋果》fb留言說，子瑜鞠躬道歉的影片，實在看不下去。秋生說:「心噏！搞到咁樣嚟欺凌，咁嘅畫面出咗嚟係完全一個反效果，仲拍乜嘢手掌呢？」

「即係我走去球場打個0靚仔，然之後自己走去扮大佬一樣，根本就冇關係。你真係咁叻咁醒，咪搵啲台獨嚟搞，搵個細路嚟搞做乜？好明顯就唔關事啦，夾硬話關事，真係氹鬼食豆腐！」

秋生續道：「唔好講話係咪台灣人攞唔攞國旗，直情單嘢係無謂，係一單無聊嘅欺凌少女變咗一件國際政治事件，你話幾戇居？又冇人停咗個黃安㗎喎？佢咁樣搞落去，兩岸關係都比佢搞『橫』呀！」