世界盃開鑼，最近呢幾個星期全世界都陷入足球狂熱，無論大人細路都一樣坐定定睇住個電視嗰二十二人龍爭虎鬥，台灣天王周杰倫都唔例外，尋晚台灣《蘋果日報》就收到讀者爆料，話周杰倫同老婆昆凌一家喺一間餐廳好肉緊咁睇緊世界盃。

據台灣《蘋果日報》報道，尋晚周杰倫一家一邊食炸雞一邊睇澳洲對秘魯嘅世界盃轉播，因為混血嘅昆凌爸爸係澳洲籍，一家人就自自然然支持澳洲隊啦，可惜最終澳洲隊以0：2不敵秘魯，一家人隨即離場，對於澳洲輸波，昆凌就話：「已經有心理準備，但還是會難過。」

不過，呢一晚嘅焦點就由足球轉咗去周杰倫嘅背影上，事關佢戴住冷帽（呢個天氣，戴冷帽？）嘅後腦望落好乾淨，一啲頭髮都冇，自然就令人擔心佢有脫髮危機，而周杰倫喺上星期舉行演唱會時後腦仲有頭髮，問到是咪換咗新髮型？周杰倫公司回覆台灣《蘋果》話：「照片不清楚，不知道怎麼回應。」而老婆昆凌就坦言老公最近有「修頭髮」。

精選娛聞，喺晒《娛果》
http://fb.com/appledailyent