話唔同摩連奴比較，假嘅！波亞斯前日落實任教車路士後即時見傳媒，可能因為教富豪球會關係，連個人都即時豪爽晒，開張連摩連奴都做唔到嘅「4冠王」期票。想達標就要改革，傳佢已準備為隊波除「黑」氣，一於去蕪存菁。
以「勤」字起家嘅波亞斯，前日一上任就應酬傳媒。佢果然同鍾意噴口水嘅摩連奴一脈相承，劈頭第一句就話：「我有信心滿足球會嘅期望，集中火力爭取4個應該要贏嘅冠軍。」問到同摩連奴比較，佢就耍太極：「我唔認為球賽係個人騷，足球比賽應該係集智慧同好球員嘅大成。」

賣7件籌7,000萬鎊

之前有消息指老闆阿巴莫域治將會畀8,000萬鎊佢去擴軍，查實其中7,000萬鎊應該係喺裁軍得嚟。《鏡報》傳出佢已鎖定一張清洗名單，個個都標埋售價，一有買家就掟走，包括約翰米基爾（1,500萬鎊）、沙洛文卡勞（1,500萬鎊）、馬隆達（1,000萬鎊）、艾辛（1,000萬鎊）、杜奧巴（1,000萬鎊）、安歷卡（500萬鎊）同埋林柏特（500萬鎊）。
艾辛要賣合理，因為佢近年傷嘅時間多咗；安歷卡走下坡而人工貴；杜奧巴同波亞斯都係33歲，佢不嬲都唔易駕馭，新帥自然唔鍾意，數吓數吓，上述都係黑人，白白淨嘅林柏特又點？唔通係波亞斯妒忌林伯靚仔過佢？未必，只係趁同佢同年齡嘅林伯仲有少少價值，善價而沽。
波亞斯有今日嘅成就，係拜恩師卜比笠臣所賜，前葉士域治領隊佐治貝利爆料，原來已故嘅老笠10年前已經同佢講，波亞斯係每事問，他日必成大器喎。唔使搵問米婆問老笠，波亞斯係龍定係蟲，一季後自有分曉，博彩公司列佢首季領軍就有錦標嘅賠率熱至1.72倍。