當年今日
關於我們

  亂箭橫飛有暗湧 唐唐一醉解千愁 - 李八方

蘋果日報 2005/11/21 00:00


特區變天之後,三司換咗兩司,肥龍許仕仁挾橋王之勢重返政府,大有我不入地獄之豪氣;皇仁之龍黃仁龍以香港故事主角忽然空降,成個包青天咁款。兩人風頭咁盛,民望咁高,另一位司長唐英年自然相形失色,好似潛咗水咁。不過唐唐並非完全歸隱,上星期五晚,佢就喺官邸開party(聽聞佢好少返壽山村官邸住,只係用來請客,咁唐唐一介貴公子,又係唔使咁緊張要間屋嚟光宗耀祖嘅),有紅酒,有美點,重有隊Liveband演奏,氣氛一流;趁煲呔去咗韓國釜山見領導人交功課,肥龍又日日周旋區會乞票之際,偷得浮生半晚閒。
開派對答謝各界
咁唐唐並唔係開私人派對,而係公事嚟嘅。原來為咗答謝各界嘅支持,財爺每年喺秋冬時節,都會搞三幾場聚會,宴請各個諮詢委員會成員、立法會議員同各國駐港使節等等。上周五晚係第一場,重有其他。八方問財爺有冇乘機諮詢吓大家對下年度嘅財政預算案有乜高見?佢位新聞秘書羅志康就話,個聚會主要係想多謝吓各位友好,就算係傾都係非正式交流交流意見。
財政司府邸位於港島南區,環境幽美,雖然房就少啲,但有塊好大嘅草地,喺嗰度開party最好不過,加上政改唔關唐唐事,世貿又未燒到佢,真係短期內冇風冇浪,何不拉吓頭馬,飲杯靚紅酒,睇煲呔肥龍表演。
話唔減稅被狂鬧
其實話冇風冇浪都唔係好準確,今年特區環境好番多少,政府冇咁窮,減稅之壓力又馬上出現。喺現時形勢,放水同派錢係收買民心同爭取政治本錢最好方法,最有利煲呔連任。但做掌櫃嘅唐唐就頭痛,早前講一聲話唔會為博取短暫掌聲而減稅,即時亂箭橫飛,又話公子出身,又話不察民苦,重上綱上線到話迫中產下個月上街遊行,真係大罪。佢重諗住明年喺預算案中提出開徵銷售稅工作時間表,真係想唔死都幾難;你話係咪開支酒,一醉解千愁好過?

傳真︰2623-9278
電郵︰[email protected]
empty