男生圍:烈火狂牛 複製王喜命格
今晚,蠻牛悲歌終於隨着《烈火雄心3》大結局了斷。近來觀眾網民嘀嘀咕咕:「王喜使唔使咁慘呀?」王喜飾演的消防隊長阿牛昏迷失憶、撞車斷腳,至愛胡杏兒離他而去,改投死黨鄭嘉穎懷抱,他失戀失業更被千夫所指。是夜終極大火,他捨己救同袍嘉穎及黃宗澤,差點氣絕身亡,最後卻戲劇性生還。阿牛一生固執引發坎坷命途,炒車、自殺、遇溺都死唔去,連王喜都苦笑說:「阿牛死咗好過,生無可戀!」 撰文:朱倬誼
阿牛雖然是好人一個,但觀眾睇《烈火雄心3》時依然要邊睇邊鬧,誰叫阿牛慘得太戲劇化,而且歸根究柢係自己攞嚟衰,倒是王喜說:「現實中有比阿牛仲慘嘅人,劇集只係將啲慘事濃縮喺佢身上,用有限篇幅帶畀大家娛樂,同引發大家嘅惻隱之心啫。」
過去10年王喜拍過《烈火》三部曲,大多數人都以為他在最後一部《烈火》會繼續奮戰火海,同袍情如首輯的南山三虎,可惜阿牛不只跛腳裝義肢,與鄭嘉穎和黃宗澤恩怨化不開,最愛的胡杏兒也不要他,跟嘉穎做一對。
如果今晚播映的大結局可以重寫,王喜寧願阿牛一死,「佢死咗好過,生無可戀,好彩佢最後都苦盡甘來,都得到簡慕華嘅愛。至於南山三虎嘅手足情,如果今次都係咁,觀眾又會覺得冇創意,況且我一廂情願,將南山三虎借屍還魂係不切實際,我唔可以冀盼鄭嘉穎同黃宗澤係錢嘉樂或者鄭敬基。」
阿牛因為一次被指判斷錯誤,令別人先入為主,不管往後他怎樣努力都是錯,向來被指麻煩的王喜自嘲:「感同身受。」
監製王心慰才心水清,一直借王喜的性格投射角色中,由第一代消防仔駱天佑到人父紀德田再到阿牛亦然,王喜說:「如果駱天佑真有其人,10年後都會變成鍾有成,王心慰當日係邊了解我邊創造駱天佑,拍《烈火3》佢同我講鍾有成係以某部份嘅我做藍本,所以拍時係好似翻閱自己。」
王喜重回10年前拍《烈火》玩freefall的現場,但物是人非,當年的戶主已搬走,幸好現在的戶主也十分歡迎他到訪(右圖)。
王喜承認他有固執一面,也因而影響星途招惹是非,「從前當我睇到劇本唔順暢、有矛盾,會反應過激有冇搞錯呀,覺得係天大嘅罪行,嗰時未戒粗口未戒煙仲食肉,加上我係獅子座,有好多好誇張嘅表達,啲人覺得好小事啫,使唔使咁呀?」如是者他是非不絕,但人大了銳氣消磨,傳他和鄭視帝有心病,王喜只說:「大家一般同事相處啦。」是否戲外不可做朋友?他也笑:「你唔係要設一個目標結識一個人要達到乜嘢結果,我哋經過2008年5月15號至10月28號呢段拍攝時間,得出嚟都係同事關係。咁咪好囉,仲想點啫?」啊!明白。
王喜和無綫總經理陳志雲早於92年商台時期認識,眼前42歲中坑之齡的王喜,竟於近日才被指加入「迷雲黨」,褒貶一線間。
17年朋友,今日竟被形容為陳總新寵,王喜得啖笑說:「舊朋友識咗10幾年仲何來新歡?一路唔強調係因為大家識得耐,避免人哋誤會佢偏私或者誤會我做黃馬褂。」志雲與身邊男愛將的關係耐人尋味,盛傳是同志的王喜更加唔使講,王喜卻說:「是但啦,希望唔好傳陳生,我哋咁聖潔嘅友誼唔應該沾上冇必要嘅傳聞。」
王喜認識陳志雲十多年,到近日才被封「迷雲黨」新寵。 資料圖片
講開陳總新聞之多精采絕倫,王喜卻為這位老友抱不平,「佢嘅花邊新聞無疑令大家津津樂道,但佢真正功能係我哋嘅總經理,喺節目創造同規劃上發揮好重要領導同管理角色,因為有佢至有好多有質素嘅節目好似《向世界出發》、《冰天動地》、《志雲飯局》嘅出現;又好似最近嘅公聽會,有好多人對TVB嘅偏激同唔公道嘅批評,佢捍衞公司同普羅大眾權益,往往換來無謂指摘。」你又知?「我同陳生食飯,佢呻畀我聽囉。」
陳總搵得王喜訴心曲,情非泛泛不贅言,王喜則淡淡然:「八字夾到咪得囉,朋友相處時候係呻吓,呻完就算。佢係總經理,我係演員,唔會幻想總經理幫我做啲乜,我都係一個挺起胸膛去面對噓聲同掌聲嘅人,使咁多橫手同我鋪橋搭路都唔馨香,我又唔會因為係佢朋友特別飛黃騰達。有啲乜嘢事,第一時間唔保我就係佢呀!第一個閃咗先,因為要避嫌,佢要撐我,我都唔畀佢撐啦。過去我喺咁多篇文章入面飾演丑角歹角甚至反派,有邊個撐我吖?佢撐只會畀人話偏幫,咁又何必呢?如果我倚仗陳志雲嘅關係,我一早攞視帝啦。」
《烈火雄心》系列已經發展至第三輯,元祖級消防員王喜的英雄形象深入民心,《烈火》之所以長做長賣,除了火災場面震撼視覺感官外,最重要還是消防員之手足情義,觸動人心。
98年
《烈火》南山三虎(左起):錢嘉樂、鄭敬基和王喜令烈火燒得有情有義有收視。
02年
在《烈火2》中,可愛的成珈瑩配慈父王喜,演繹單親家庭的父女情,令觀眾深受感動。
09年
王喜在《烈火3》中同嘉穎(左)由火場鬥到情場,連場黑面互睥,欠缺了觀眾最愛的情義元素。