睇下張海報，嘩，個個乸口乸面，再望下劇名，叫《我的1997》……香港人拍㗎？講主權移交後香港人嗰種絕望嗎？套劇仲有《大俠霍元甲》主唱者徐小明同《來生不做香港人》嘅龔慈恩參與，仲唔係？

唔係。

央視呢套《我的1997》，係中央送俾香港人嘅禮物，賀你「回歸偉大祖國」20周年呀。

香港人記憶中，20年前那一夜，是大雨滂沱，彷彿天要塌下來。香港人一邊流淚，一邊想為彭定康的千金抹乾淚痕。

解放軍駐港，香港區旗由藍變紅。20年轉眼過去，社會分裂，大白象工程處處、官商勾結…香港現在無處不是爛地，無處不是工程。行過會聽到錢聲。

但大陸人眼中的「1997」，是完全不同的回憶。

以上香港人的回憶或所感，你不會在中央送俾香港人的禮物——劇集《我的1997》見到。

你會見到的是，代表香港闊太的龔慈恩及富商的徐小明，女的說：「總之不是英國人管理的香港，我就沒有信心!」男的即說：「你可以相信英國人，但我相信中國政府，我相信中國共產黨！」

全劇金句尚且包括：
「1997年，香港就要回歸祖國的懷抱，這是一件令人非常激動和振奮的事。」
「回家！」
「一起祝福國家的昌盛，還有甚麼比這更圓滿的？」
「我們來共同見證香港回歸，這一偉大的歷史時刻！」
「中華人民共和國萬歲！中國共產黨萬歲！」

《我的1997》故事大綱，其實唔關香港人事。故事背景由1976年至1997年，「以高建國為代表的一系列小人物視角，折射出一代人在時代的滄桑巨變中，生活與情感的起伏沉澱，以及他們為改變命運而不屈奮鬥的勵志情懷。」簡言之即係，男主角有次飲大咗，打傷女友個哥哥，惟有著草同阿媽「逃港」，「在美麗善良的香港少女阿芳和古道熱腸的海叔的幫助下，他們輾轉漁村、工廠、鬧市，總算找到叔叔家，但嬸嬸對他們這樣的不速之客卻是橫眉冷對……」

即係大陸人如何來港再一步步拎到身份證，中間加啲恩怨情仇，然後大團圓「見證香港回歸」。

導演王偉民仲將《我的1997》自行升呢與《阿甘正傳》相提並論。王導之前仲有套《彝海結盟》，中共革命題材，講述紅軍長征……王導話：「我們這一代導演需要拍一批這樣的紅色題材留給現在的年輕觀眾。」候任特首777啱啱先講完要香港小朋友由幼稚園開始學愛國呀。

套劇今晚首播。微博上反應都幾冷清，反而香港網民熱烈好多，大家七嘴八舌問：
1.幾多個演員拎外國護照？
2.慶祝成功強姦香港二十周年
3.為何不拍我的1989？
4.全部大陸人，主權移交。關佢哋乜事？？
5.劇是講大陸如何攪亂香港，所以有很多大陸人想看。
6.難聽過粗口
7.歪曲香港歷史
8.仲有乜好講？你玩晒啦。唔同你玩啦。可憐班港豬，水浸眼眉都未知。

這位網民見解更精闢，佢話：「0依家唔係你哋班香港人睇唔睇嘅問題，佢就拍嚟俾外人睇，外人信咗佢套說法，到時你哋就渣都冇。係搶奪緊對香港嘅註解權呀⋯⋯」

笑甚麼？表面上o依家唔使睇紅劇，2046年又點？家陣大台密密同騰訊、愛奇藝合拍劇集，大家讚佢肯落本又4K又盛，呢條數，唔使還㗎？

呀，留意番，現實中的龔慈恩，持加拿大護照；而劇中另一愛國男主角徐偉棟，即徐少強同雪梨個仔，都係加拿大籍。