黎瑞恩(小恩子)噚晚喺紅館舉行「感恩有你演唱會2018」尾場，吸引容祖兒同媽咪、張智霖、袁詠儀、無綫高層曾勵珍、溫碧霞、劉曉彤、阮兆祥、秦沛等到場欣賞，表演嘉賓係蔡一傑同鄭秀文，傑仔表示大讚小恩子為人夠義氣又sweet。鄭秀文同小恩子合唱，觀眾開心到起身跳舞，小恩子即刻話：「你果然係天后，你一出嚟，個個就起晒身。」鄭秀文笑住話：「乜你咁冇面呀，話晒個場係你㗎喎，我聽番把熟悉嘅聲音好感動；佢喺一年前已經搵我做表演嘉賓，我梗係話好，我一定舉腳支持，想做就要做，趁自己有能力就去做，而且呢個演唱會係為慈善，能夠用自己嘅天賦去幫助有需要嘅人，呢個意義係好大；我識小恩子28年，佢大情大性，易笑易喊，聽聞呢兩晚喊咗10幾次，見你經歷咗唔同嘅人生階段，開心唔開心都好，喺呢個圈出出入入，但我好大感動，望住你，我自己都想喊，真係戥你開心，呢個騷係為愛而開。」小恩子透露好多人捐錢，能夠買20部洗腎機。

當小恩子唱《活得比你好》前，佢話：「回復單身之後都幾開心，喺facebook有好多朋友會問候我，有一啲女性朋友話同我有差不多嘅遭遇，我覺得愛情嘅嘢好難講，呢啲情況唔一定係女士會遇到，可能男士都會遇到，以下呢首歌，我唱係冇特別意思。」不過佢獻唱期間都忍唔住喊。唱到《雲上的日子》，小恩子又唱到眼濕濕。之後佢同當年嘅屯門合唱團朋友一齊合唱《一人有一個理想》，唱到尾聲，小恩子感謝呢班朋友嘅時候，又忍唔住喊；到安歌位，小恩子感謝台下的觀眾：「多謝你哋28年嘅支持，我喺呢個樂壇出出入入，一時出去，一時返嚟，但係大家仍然咁支持我，我真係好鍾意唱歌，(開始又喊)，沖涼又唱，煮嘢食又唱，打麻雀又唱，終於等到16年後，我再返嚟呢個紅館開演唱會，多謝紅館俾呢個期我去開，仲係清明節，我講真嘅，因為大家都放假，將來清明節，你哋會諗起曾經睇過我嘅演唱會，咁都幾好丫，我會記住今晚，因為我唔知幾時再喺大家面前唱歌。」講完，小恩子繼續喊。

完騷訪問，講到佢喊咗好多次，小恩子話：「係呀，見番合唱團嘅同學，大家日日練歌，好努力，佢哋30幾年冇唱歌，好感動，雖然大家唔係成日見面，但仍然有一齊嘅感覺；另一個喊，希望大家唔好以為我因為離婚，我只係覺得Wyman嘅詞寫得太好，歌詞放喺每個人身上都可以用到，我唔能夠太投入唱歌，因為放晒啲感情入去會好易喊。」小恩子透露子女都有嚟睇，佢話：「阿仔本身話噚日睇一半就走，因為佢唔識我啲歌，我叫佢當係支持我，留低啦，如果悶先至走，點知阿仔睇晒，夜晚喺屋企都打畀我，佢話想今晚再睇，雖然佢唔知我啲歌唱乜，但佢覺得真係幾好睇，其實因為佢讀國際學校，中文好差，但我知佢咁鍾意，我都好感動，所以我趁機叫阿仔學多啲中文。」

精選娛聞，喺晒《娛果》
http://fb.com/appledailyent