藝人壓力大，工作同感情都係娛樂焦點。

周麗淇（Niki）出道至今算係愛得坦白，過往跟鄭嘉穎同內地演員徐正曦拍拖，佢都大方承認，雖然兩段感情都唔可以開花結果，但Niki仍然靜待Mr.Right。單身Niki寄情工作，用工作填滿時間表，Niki日前喺灣仔接受《蘋果》專訪時話：「人就係咁，當你冇得諗，咪focus喺工作，你見我有一排可能好懶散，就一定有『景轟』，我唔做嘢，一定係有拖拍，可能我個人就係咁，我會好focus一件事，唔鍾意分心。」

Niki話唔覺o依家好Dry：「可能某程度上習慣咗，好多朋友好錫我，見我做嘢辛苦，佢哋會煲湯畀我飲，叫我上去食飯，又或叫我出去，介紹男仔畀我識。」Niki唔抗拒呢類正常社交，佢相信緣份，冇得勉強：「分分鐘行過街，就遇到佢啦。」

Niki去年接受《蘋果》訪問，被標纖為「黃金盛女」嘅佢開出擇偶條件，佢話字典入面冇理想情人，大家要click到，對方唔一定有錢或富豪。事隔一年，Niki繼續單身，佢講笑話擇偶略調降級：「我已冇乜要求，之前有講要憑感覺，靚仔梗係好啦，呢個世界冇人唔鍾意靚仔靚女，情人眼裏出西施，當你覺得佢好，咁就乜嘢都靚㗎喇，乜嘢都係有感覺先得，鍾意就講個feel。」

Niki嘅好姊妹容祖兒同蔡卓妍都已拍拖，Niki話：「係啦，仲幾好㖭。」佢話兩位好姊妹冇催佢：「佢哋好明白，做我哋呢行業比較難，即係你揀人，人揀你，又或timming問題，會互相祝福同鼓勵。」Niki亦唔抗拒戀圈中人，冇去諗對方背景，「我以前話矮過我唔得嘅，o依家覺得平排，或者矮過我都得㗎。」佢眼見長短腳戀都有開心例子：「我見過幾sweet，世界係自己嘅，感情留番畀自己好啲，我始終係公眾人物，好多嘢已畀人拎去審判、評價，作品、樣貌、身材、演技啦，感情呢樣我明白，私生活我想留番畀自己，我唔理你哋鍾唔鍾意，合唔合襯，合唔合適，我自己feel到舒服，至緊要閂埋門，自己覺得開唔開心。」Niki坦言以前介意被評價，「介意埋外間眼光會好辛苦，我哋職業好多時被批評，我可以接受，但感情唔好批評，冇對與錯，戥我開心，唔需要太多聲音。」
　　
感情方面，Niki完全唔心急，「我好positive，我覺得會有，可能唔係呢個moment，2018年，差唔多啦，我feel到好近。」Niki是家中孻女，上有胞姐周汶錡同一位哥哥，兄姊都已生B，Niki希望將來婚後都會生下一代：「我都鍾意小朋友，生到兩、三個都OK，四個就唔好啦。」現年38歲嘅Niki會考慮雪卵嗎？佢話：「呢樣係社會科技發達進步，我唔抗拒，我唔反對人去做，但我未諗過，身邊都有朋友做，當買個保障，只係我暫時冇咁需要。」

Niki準備好隨時迎接一段新感情，到時會唔會閃嫁？佢話：「好多人問過我幾時結婚生仔，我真係唔知，我唔知下一個搵到嘅係咪結對象，如我突然閃婚，可能我已拍拖兩個月或半年，嗰段時間已經超越以前拍拖嗰段好長時，每段時間，成長、思維都唔同咗，o依家會唔諗咁多，可邊結婚，邊拍拖，亦可邊生仔邊結婚，同步進行。我希望將來結婚後有家庭有小朋友，仍可維持初衷，有愛喺一齊。」Niki直認係浪漫女，佢都想配對浪漫仔，「我希望對方好浪漫，成日製造浪漫氛氛畀我，咁就好sweet，相輔相承，我都可以好浪漫。」都係嗰句，有一日大家發現Niki心散，就暗示戀愛中，「我一心不能二用，又要拍戲，又要做event，又要拍拖，開頭可能我『舂』晒去拍拖，到時時間就識分配，心中有個稱，總之2018年，好嘢快啲嚟！」

【minigame】2017瘋暈人物 返工打機唔使擇日
http://bit.ly/2CeWQkP

更多娛聞，喺晒《娛果》
http://fb.com/appledailyent

場地：旭逸雅捷酒店
服裝：Lane Crawford
化妝：Omix B
髮型：羅可晴@La Mod Salon