今晚是平安夜，但衞生防護中心傳染病處主任張竹君於疫情記者會上宣佈，由於富山邨富仁樓再多一宗確診個案，涉及多1個不同樓層、不同座向的單位，故12月13日起曾到訪逾2小時者須強制檢測，12月20日起曾自行檢測者可獲豁免。目前富仁樓共有4個單位出現確診個案，不少居民於記者會公佈後，紛紛到樓下由檢測承辦商華大基因負責的流動採樣亭進行檢測，採樣亭外大排長龍。

富仁樓居民黃小姐表示，自己是於記者會後獲悉需要進行強制檢測才下樓做檢測，指自己雖然已於本周一（21日）做深喉唾液檢測，屬可豁免人士，「但問人話最好再檢測多一次，咁咪再做埋囉」。對於大廈再有人確診，黃小姐直言「冇得擔心，全世界都係咁，咪自己保護吓囉」，會繼續做好防疫措施，但她也指自己目前在家裏不敢開窗，「衫都唔夠膽曬出嚟」。對於日後強制檢測的大廈或會有其他執法行動，黃小姐認為若能讓確診個案歸零，實行強制出入措施可以接受，「最緊要啲菌快啲走」。

同樣居於富仁樓的退休人士卜先生同樣是於記者會上得悉須做強制檢測，今日是第一次進行病毒檢測，「擔心就普通啦，因為唔係多層落嚟同一個單位有確診，而係呢度一個、嗰度一個，唔係特別擔心」。卜先生指由於自己已退休，故平日也較少出門，對於日後若需管制出入，他認為是無可厚非，「因為你要清零就冇辦法啦，都接受」。

不願上鏡的廖女士與丈夫及孫兒一起進行檢測，她指本周一已與家人交回深喉唾液的檢測，但仍於今日排隊多做一次檢測，「我本人冇乜擔心嘅，檢測吓得個安心」。目前富仁樓再多一宗確診個案，廖女士表示會加強消毒消潔工作，「門框門柄都會噴消毒，我唔搭𨋢啦，住低層就行樓梯」。對日後有可能會被管制出入，她認為可以接受，「不過政府真係要畀到陰性結果我，我先可以畀到執法人員睇囉」。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！