英國周四舉行「脫歐」公投，大吉利是講句，如果到時真脫歐，市場點波動法？以下係滙豐專家預言，讓你我有個心理準備。

滙豐銀行話，如果英國周四公投結果贊成脫歐，英鎊兌美元最多跌15%，首相卡梅倫可能係周五呈辭。

滙豐解釋，資金瘋狂追捧債券，並大舉拋售股票，英國富時100指數料跌到「阿媽都唔認得」。對於卡梅倫仕途，滙豐表示留歐陣營失敗意味卡梅倫面臨辭職壓力，若卡梅倫辭去首相職位，將令保守黨陷於動盪。

滙豐仲話，如果英國周四選擇脫歐，英倫銀行到時可能出手為市場提供流動性，特別係當美元出現短缺時。不過，滙豐強調英倫銀行干預匯市可能性不大，除非匯市情況十分惡劣，因為英倫銀行希望英鎊貶值，以吸引外資，解決英國赤字。

滙豐估計，脫歐將令英國2017年本地生產總值（GDP）增長縮到1%至1.5%。至於歐盟，滙豐話如果英國脫歐，歐盟今明兩年GDP增長料向下調整0.2%。

掌握財經生活資訊，即Like「蘋果ATM」fb專頁啦！
http://fb.com/appledailyatm