當年今日
關於我們

【李八方online】離任總商會盡訴心中情 袁莎妮:反修例運動係「人為風暴」

蘋果日報 2020/03/05 18:08

王維基李八方ONLINE袁莎妮

前年下嫁香港電視創辦人王維基嘅前AO靚女袁莎妮,嚿年中正式請辭總商會行政總裁,今個月底正式散水。佢接受商會刊物訪問時透露,本來想做到嚿年底前,最後捱義氣坐多三個月,協助搵接任人,但佢冇透露接任人選係邊位。

最初支持《逃犯條例》修訂基本原則嘅總商會,喺反修例運動爆發後曾經發聲明要求撤回修例,又要求成立調查委員會,彈出又彈入,加入總商會8年嘅袁莎妮接受最新一期商會月刊訪問時盡訴心中情。佢話正如政治動盪將香港分化一樣,總商會內部同樣會有好多不同意見,增加咗主席同理事會領航嘅挑戰;評論到總商會內部,佢又話處理根深蒂固嘅立場同兩極化態度將成為新常態,未來只會更加難行,但相信總商會可以憑佢獨特嘅地位,協助解決各方互不信任同修補社會撕裂。

林鄭面對反修例運動束手無策,只係能夠靠3萬人嘅警隊頂住,政務官出身嘅袁莎妮喺訪問到形容呢場政治運動係「人為風暴」,話見住場「人為風暴」不斷失控升級,令佢極之難過,甚至近乎絕望,佢仲話而家嘅香港同修例運動前嘅香港已唔再一樣,但係變得更好定更壞,就有待分曉。

有個會戴住豬嘴入「暴大」嘅老公,可能思想都唔同啲,雖然做過高官,但袁莎妮話問題唔止經濟同民生問題,仲包括社會對一國兩制嘅信心問題,要走出困局,就要對2047問題展開廣泛、有根據嘅討論。

至於未來動向,袁莎妮不言退,佢話已略懂商業政策和政治嘅處理技巧,未來無論怎樣發展,一定繼續服務香港,但現階段想多啲陪伴家人。話時話,2016年曾經參選立法會嘅王維基,有賢內助全職照顧家庭,會唔會今屆再出擊?

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架