滙豐編製中國PMI跌至三個月低，港股借勢回吐，如果恒指喺低位，PMI回軟一定會變成加強放水預期嘅利好消息，消息呢家嘢，真係有100種演繹方法。睇資金流更實際，收市後港滙再度轉強，觸及7.75強方兌換保證，有傳中資買盤積極，唔通又有春江鴨想趁滬港通前先掃為敬？

內地體育用品一哥安踏（2020）公佈業績前瘋狂炒高，放榜後未見獲利盤沽貨，喺高位橫行一輪後，噚日炒高近4%兼突破旗形，第二波升浪一觸即發！安踏中期營業額41.2億銀（人民幣．下同），按年增長22.4%，盈利則升28.3%至8億銀，bottom line比top line勁，主要受旗下FILA品牌帶動，令毛利率擴闊4個百分點至45.1%，自由現金流更大升52.3%，營運保持良好勢頭。

派息吸引　睇升一成

過去數字靚仔，前景亦夠吸引。安踏2015年首季訂貨會定單錄得低雙位數升幅，為連續第二季有此佳績，今年第二季同店銷售增長，亦有低雙位數升幅。管理層更強調，非常有信心繼續保持增長，樂觀指數達十粒星。安踏派息吸引，雖然累積升幅不少，但現價息率仍有3.5厘，可謂攻守兼備。
證券商亦一致睇好，其中花旗認為FILA品牌霸氣可持續，又預期童裝業務將成為安踏未來增長引擎。安踏噚日收報15.26港元，再度逼近52周高位15.34元，一旦升穿，又係海闊天空格局，戰友可候回試15元買入，目標16.5元，潛在升幅一成。

唐牛
https://www.facebook.com/tongcow88