曾出演韓片《3個特攻美少年》、韓劇《Signal》嘅52歲男星孫賢周，佢憑主演嘅韓片《普通人》獲得莫斯科國際電影節最佳男演員獎，孫賢周因為正拍攝電影，所以未能親到當地領獎，並由《普通人》導演金峰韓代為領獎，今次亦都係自1993年韓國男星李德華憑電影《活下去》獲得莫斯科國際電影節最佳男演員獎後，第二位男星再獲此獎。

《普通人》故事係講述80年代，一名警察同國家安全企劃部局長對抗嘅故事，飾演父親一角嘅孫賢周為咗守護自己家人而同權力一派展開對抗。電影播出後大受好評，除獲邀喺第39屆莫斯科國際電影節競賽單元外，亦邀參加第16屆紐約亞洲電影節及第31屆日本福岡亞洲電影節嘅競賽單元。

對於孫賢周封莫斯科國際電影節影帝，有份出演《普通人》嘅張赫亦都好戥對方高興，仲第一時間上載二人合照到Instagram，並祝賀對方得獎。