「4年一次，公司冧都冇辦法啦！」

男人，30零歲，返工營營役役，收工渾渾噩噩。昔日的夢想，團火仲有冇？

遙想當年中學，一放學就踢波。扮巴治奧扮古列治，同隊友眉來眼去no look pass， 踢爛了多少對白飯魚，制霸過多少街場，如今，團火仲有冇？

往事湮湮，其實仍在當下。小記剛隨now tv率領的世盃採訪團抵達俄羅斯，一到步，就發現了一團仍在燒的「男人的浪漫」。

7個麻甩佬+1個阿嫂，有四眼摩迪、有96年德國「穿越」fans (點解相隔22年仲着住件舊波衫？)、有美斯粉couple、更有巴西法國西班牙葡萄牙粉，一人撐一隊，竟無損感情更無交打。

小記好奇上前「搲水吹」，發現這個麻甩睇波團最浪漫之處，原來這7位麻甩佬都是中同，相識20多年，一齊踢波踢到大。今次專誠相約赴俄羅斯，就是為了一齊睇世界盃。

今時今日約齊腳踢場波都如此艱難，約齊人請假去睇波就更難上加難。撐西班牙的肥仔哥就話，為了集齊人睇世盃，足足籌備了8至9個月，難度好比收集7粒龍珠。而德國老粉潘先生就話︰「4年一次，公司冧都冇辦法啦！」豪言壯語，堪比冰島右閘「樽鹽哥」同老細請假踢世盃一樣型。

男人30幾，都可以執返團火，制霸唔到世界盃，同好兄弟一齊制霸看台，同樣有今生無來世。

好一張「那些年」的海報。幅相，有聲。

後記︰佢地隊波叫做「友青」，今次仲帶埋支隊旗嚟睇波。小記多口一問，「友青」是否代表「友情」？ 那心字何在？語畢，小記方知多餘。心字，早在心中。

【動記者梁智威俄羅斯直擊】

--------------------
一網睇盡
足動世盃 直擊俄國最前線
https://hk.feature.appledaily.com/worldcup2018/
--------------------
《體蘋果》陪你睇波講波
https://www.fb.com/appledailysports
--------------------
迎戰決賽周！《BFB CHAMPIONS 2.0》登入免費送連抽，超級球星立即入隊！
http://bit.ly/2xrTKGM