由打工仔變為老闆的陳烘，乃60年代典型的大陸人逃到香港其中一個。立足香港逾半世紀的他，由一個相機發燒友，發展成古董相機收藏家兼擁有商舖，他寄語今天的打工一族「要肯捱、唔好份份工做唔長」，要全力以赴，千萬不要抱著縮骨和偷懶心態，才是人生的致勝術。

陳烘憶述，60年代的香港，要人擔保才能有份工作，他說，當年從廣州到香港時只得20歲，因沒有「舖保」(即需要人擔保)，寫了數百封求職信也沒有回音，直至尖沙嘴的遠東攝影器材公司，破例取錄了他，才有份工作，更展開他近60年的相機事業。

工作機會來得不易，他更珍惜，陳烘憶述，「初時返工，每個月得一日休息，但我連嗰日一都唔敢休息，因為你休息既話，你就洗錢，但嗰時屋企窮，我要寄錢返廣州畀老豆老母，所以每日返工朝9晚9，朝早開舖，抹玻璃，掃地，食飯既時候服侍前輩上司，食完就執台，洗碗，到夜晚就收舖，每月個人工150蚊！」

陳烘說，「我最記得嗰陣時，全日都喺舖頭，喺舖頭瞓，冇錢租屋，但又凍到咩咁，冇床，喺地下，好辛苦！」但他謹記，「你做咩都係，你一係就唔做，你一做嘅話，就一定要全力投入，千祈唔好依度就做三幾個月，嗰度又做三幾個月，正一就屎坑關刀，真係文又唔得，武又唔得，你做咩都係，盡你嘅努力，老闆一定欣賞你，千祈唔好我哋俗稱叫縮骨，偷懶。真係架，你一定要全身投入。」

陳烘工作了一年後，便升職到了分店店長，月薪大躍進至400元。他於遠東攝影器材公司工作了約十年，最終1972年出走，於香檳大廈自立門戶，主打外國旅客生意。他說，「嗰陣每月800元，我就係畀得咁多，舖面只有依家1/4，挨租都好很辛苦！但一諗到相機係自己的事業同興趣，點都值得。」

那個年代正值相機高峰期，他指，「嗰時美國打完仗，而美國人又貪新鮮，一定帶相機過嚟，仲要係德國相機，咁我靈機一觸，就聯埋行家，用日本機換佢哋德國相機！」巧合一位日本相機買手，那時帶日本水貨相機來港，打算以日本相機換德國相機，於是陳烘便從美國遊客中拿德國機，轉手賣向日本相機買手。

與日本人做生意有一樣好處，就是永不講價，他選定的相機，即使價錢再貴，仍會購買，他便從中學懂分辨相機的差劣。陳烘說，「有部相機，今個月賣1000蚊，下個月賣1200蚊，再下個月1500蚊，佢全部都買，咁得喇，依部機係靚嘢。」他說，那時候日本相機大約幾百元，每次轉手貴約一至兩成，就在此時，他賺第一桶金。

其後經濟條件轉好，他便開始收購一些珍貴的相機收藏，同時購入香檳大廈的店舖擴充，一步步建立自己的博物館。陳烘感慨，「相機生意最輝煌，一定係70至80年代，當時相機商會月刊，連沖曬、菲林代理，有成200間相關店舖！」但受數碼相機的誕生，客人陸續轉移至那個市場，現時相機商會月刊的店舖，只剩下不足10間。

70至80年代，資訊未發達，顧客未能於網上格價，生意易做。陳烘說，現時年輕的一代，懂得於網上格價，當客人前來店舖問價時，他們客氣一點的，回家才格價，不客氣的，直接在你面前格價，並罵我為何賣貴那麼多！現時生意與當時相比，可謂連十分之一也沒有。

慶幸現時經濟條件轉好，避免得失朋友，現時也很少做生意，要做的話，也是年輕的大陸客，因為中國失去了50至80年代的歷史，近年中國經濟起飛，年輕的一代開始愛上菲林相機，繼而來港購買。

陳烘貴為相機發燒友，但子女卻對相機毫無興趣，陳烘指，「唔想畀細路睇到，錢係咁易搵，今日我要1000蚊收部相機返機，聽日3000蚊賣返出機，咁樣會好影響佢哋發展，所以細路就冇畀佢哋掂相機，未來都唔會幫手接盤生意。」對於未來這逾2萬部相機的去留，他笑言，「打算係工廈搵個地方，開間細舖，同朋友吹吓水咁！」

記者：黃朗鈞

影片：
採訪/ 黃朗鈞 余曉芸
編撰、旁白/ 余曉芸
攝影/ S.Dragon
剪、後期/ 溫耀康
編審/ 倪敏慧

investMAN
For People of Style & Substance
掌握理財智慧 感受生活品味
http://facebook.com/investMAN.hk