夏雨今日以mm2影視娛樂製作香港有限公司執行董事身份，喺圓方出席「mm2新晉導演計劃頒獎典禮」，同場仲有麥子樂、蔣祖曼、泰臣等。夏雨透露將同3名得奬嘅新晉導演簽約，仲會開戲俾佢哋。

一直想做導演嘅麥子樂認為自己現時嘅能力未夠，佢話：「做導演要兼顧嘅嘢太多，好難分身，不過我有寫劇本。」麥子樂仲透露將為有線奇妙台拍攝旅遊節目，將到台灣進行10日嘅體驗。問佢會唔會趁機識番個「台妹」？佢笑住話：「都會㗎！」

另外，有份演出《使徒行者2》嘅蔣祖曼，佢話有追問導演《使徒》會唔會開第3輯，但對方未有回覆。