近排政經界嘅焦點人物新聞一大籮，投資推廣署署長盧維思當年因為維港巨星匯呢鑊粥，被裁定失職兼罰款，佢仲因為咁而狀告政府推翻裁決，以自保名聲，呢單花邊新聞，令佢「受歡迎」程度明顯弱得多，加上單司法覆核官司又要押後到4月初先宣判，米老鼠盧維思一於忘記過去，投入返眼前嘅工作。日前，佢聯合惠州政府高官，向新加坡商界人士，推介香港同惠州嘅投資環境。

個推介會由投資推廣署同惠州人民政府合辦，吸引咗150幾個新加坡企業高層出席活動，米老鼠話，香港係新加坡企業進軍內地嘅橋頭堡，好多新加坡企業尤其重視一樣嘢，就係搵個值得深化投資嘅內地落腳點。
至於個推廣會點解同惠州有關？皆因惠州係深圳以外，最接近香港嘅內地城市，當地會重點發展電子訊息同石化產業，好適合坡佬投資……
米老鼠喺巨星匯單嘢上，點樣認為自己啞仔食黃蓮都好，為咗養活家中幼子，都係繼續要做、繼續唱好香港，好一篇打工仔嘅悲歌！