喺充滿客觀數據的足球世界，誰是聯賽首席射手、誰是聯賽冠軍一目了然，要選「最佳」應該不難吧？但事實卻非如此。例如「球季最佳領隊」，到底係帶隊星光熠熠嘅豪門贏得冠軍難啲？定係教隊包尾魚腩球隊成功護級難啲？
我就始終認為足球場係英雄地，借用葉問金句：「足球，兩個字，一係『贏』，一係『輸』；贏冠軍嗰隊就梗係啱晒！」故此，上屆英超冠軍教頭比歷連尼（圖）竟在兩項最佳領隊選舉皆落空，贏家係前水晶宮領隊的普利斯及紅軍羅渣士，唔知有無人好似我咁為比帥感不值？
至於球員獎項就更複雜。以「葉問邏輯」，今屆金球獎當然非世盃冠軍門將紐亞莫屬！但今屆冠軍德國，像前3屆大賽冠軍西班牙，明顯以整體合作奪冠，沒有誰比別人更重要，相反無咗邊個都唔得！
咁美斯呢？都贏唔到世界盃冠軍，又點算得上係最佳呢？但話紐亞係德軍今屆世界盃奪冠嘅「最大功臣」又好似說不過去（查實佢喺世界盃期間都無乜受過考驗……)。結論係：可能「最佳球員」同講求團隊合作嘅足球世界，根本係一個矛盾？