【楚雲聲】今次增磅靚番晒 第二場絕對有得「玩」（Cloudy）
蘋果日報 2019/12/14 20:26
Cloudy勁好玩楚雲聲
勁好玩今次體重上升是好現象
話咁快又到12月中，打後呢半個月可能係我全年最忙嘅時段，老早約到爆晒，相當多機會洗晒我全份糧！
朋友係要見嘅，洗少少錢聯誼下絕對值得。不過，為免荷包太空虛，我揀定幾隻食得瞓得又操得嘅買吓Q，如果中到就可以幫補吓。
第二場五班1400米草地，「勁好玩」體重回升番去正常水平，身色神態大有改善，咦？上季熱身後入Q，今季有兩場熱身咪仲好？
呢隻馬上次全程蝕位食風飽晒，仲跑乜鬼。今次撻番起個前速，憑住內檔可以自己帶，非常好跑。
「為你贏」去短途玩幾場都近，狀態老早擺定喺度，上返有績嘅千四兼有好檔，撞正呢場快馬唔多，好大機會坐實個「黃金包廂位」。
「得賞」有能力，今季初出好驚喜追入Q，上場「阿茂整餅」加面箍，仲要跟急兼受阻，直路散晒。今次乾淨企理上陣，同樣會跟前守好位。
「種福者」上場主動搶放叫做頂到尾，今次要唔執輸，就要起碼霸住二疊放，落班做工夫可以靠少少級數撘救。