1989年亞洲小姐冠軍翁虹，今日50歲生日喇！29年前選美出道嘅佢，咁多年嚟拍過唔少電視劇集同電影，更加做過歌手出唱片。

今日係翁虹50歲正日生日，佢喺微博分享咗唔少珍貴相片，由童年到入行都有，仲寫道：「如果我有一百歲的話，今年是我踏入人生的分水嶺！人生百年，五十歲是一個里程碑似的「轉換」，時至今日，無論是年屆半百還是出道30年，這些對我而言只是個數字。」

最近喺大陸發展嘅翁虹，被大陸網民稱為「凍齡女神」，講到佢50歲都好似30年華一樣咁靚，佢就話除咗因為父母畀佢嘅基因之外，最重要嘅就係要保持開朗樂觀，佢笑言要「把自己當成俠女活得瀟灑健康，活得精彩。」

50歲生日，都算係人生當中一個好重要嘅里程碑，翁虹就話：「最重要是活得明白，從今往後我要成為更好的自己更多的為自己而活著！」

精選娛聞，喺晒《娛果》
http://fb.com/appledailyent