「牛下女車神」李慧詩（Sarah）連續兩日K.O.倫奧金牌美亞絲，連奪兩金，勁！繼前日喺阿德萊德嘅UCI國際一級場地單車賽凱林賽，Sarah終點前險勝美亞絲奪金後，噚日又喺爭先賽4強同呢位澳洲國寶碰頭，結果Sarah又贏。美亞絲喺Twitter話：「4強被Sarah鞭撻輸了。」聽得出輸得口服心服，Sarah最後喺決賽2:0贏埋澳洲摩頓奪第2金，為下月底全運會爭金打下強心針！

撞正澳洲冬天僅得8度

唔知係咪澳洲當地正值寒冬，好似噚日朝爭先賽初賽，氣溫只得攝氏8度，所以今仗參賽外隊5隻手指數晒，得新西蘭、香港、大馬同日本；SM組合（李慧詩、美亞絲）算係今次女子組中最大名氣，二人先喺爭先賽初賽，分別以11秒451同11秒578，第2同第3最好時間入次圈（澳洲選手摩頓造出11秒441最快時間）。去到淘汰階段，Sarah以12秒633擊敗澳洲柏姬莎，之後8強贏日本車手，4強2:0再贏美亞絲入決賽。
話美亞絲係「國寶」級，呢位29歲已婚車手舊年倫奧為澳洲奪得爭先賽個人賽一金同團體賽一銅，但奧運後一直養傷，休息咗11個月至今先亮相；美亞絲今次復出，話到明為2016奧運鋪路。噚日4強輸俾Sarah後，銅牌戰贏日本代表前田佳代乃。
SM大戰仲未完，兩個或會喺周六嘅500米計時賽再碰頭，李慧詩係應屆500米世界冠軍，美亞絲係世界紀錄保持者（33秒010），相信好戲在後頭。另外，港將刁小娟周四喺女子全能賽奪亞軍。